उपप्रधान एवम् संघीय मामिला तथा स्थानीय विकासमन्त्री कमल थापाले संविधान संशोधन प्रस्तावलाई यथास्थितिमा संसदमा निर्णायार्थ पेश गरे आफूहरुले सरकारलाई दिएको समर्थन फिर्ता लिएर प्रस्तावको विपक्षमा मतदान गर्ने स्पष्ट पारेका छन्।
सोमबार रिपोर्टर्स क्लब नेपालले आयोजना गरेको साक्षात्कारमा बोल्दै उपप्रधानमन्त्री थापाले आफ्नो पार्टी संविधान संशोधन प्रस्तावमा कुनैपनि द्विविधा र अस्पष्ट नरहेको बताउँदै भने, ‘हाम्रो पार्टी यो संशोधन प्रस्तावको विपक्षमा छ। यसको विपक्षमा मतदान गर्छ, तपाईहरु ढुक्क हुनुहोस्। अझ यो प्रस्तावलाई पारित गराउन सरकारले सदनमा निर्णायार्थ पेश गर्यो भने हामी त्यतिखेर सरकारबाट बाहिरिएर, सबै मन्त्रीहरुले राजिनामा दिएर प्रस्तावको विपक्षमा मतदान गर्छौं।’
राप्रपाका अध्यक्ष समेत रहेका मन्त्री थापाले आफ्नो पार्टीको संविधान संशोधन प्रस्तावबारे पूर्ववर्ती अडानमा कुनैपनि परिवर्तन नभएको जिकिर गर्दै भने, ‘प्रस्तावबारे पहिला जे अडान थियो, अहिलेपनि त्यही छ। म सरकारमा सहभागी हुँदैमा हाम्रो पार्टीको नीतिमा कुनैपनि परिवर्तन भएको छैन। अहिले संसदमा रहेको संविधान संशोधन प्रस्ताव पारित हुनुहुँदैन भन्ने पक्षमा हामी छौं।’ उनले संशोधन प्रस्तावको पक्षमा आफ्नो पार्टी नरहेको र यसको पक्षमा मतदान नगर्ने भनेर भनिसकेकोले अब कति पटक भन्नुपर्ने भन्दै प्रश्न तेर्साए।
मन्त्री थापाले मधेश केन्द्रित दलहरुको माग पूरा गर्न आफू मन्त्री भएको दिनदेखि नै वार्ता तथा छलफल अघि बढाईसकेको जानकारी दिँदै भने,‘म मन्त्री भएको दुई दिन भयो। तर मैले मन्त्री भएकै दिनदेखि मधेश केन्द्रित दलहरुको माँग पूरा गर्न विशेष तयारी गरिसकेको छु। उहाँहरुसँगको छलफल तथा वार्तालाई तिव्रता दिएको छु। वार्ता भनेको गोप्य हुनुपर्छ, कसैलाई क्यामेरामा देखाएर बोल्ने कुरा होईन। आज वार्ता सफल हुन नसक्नुको कारण नै पब्लिसिटी गर्ने चलन भएकोले हो। यसले बैठकमा भएका कुराहरुलाईपनि बाहिर ल्याउने र छताछुल्ल पार्ने काम भएको छ, यसले वातावरण बनाउनुको सट्टा बिगारेको छ।’ उनले आफूले पहल गरेको वार्ता सफल हुनेमा विश्वस्त रहेको स्पष्ट पारे।
उनले आफूहरु चुनावको सुनिश्चितताको लागि मात्रै सरकारमा सहभागी भएको स्पष्ट पारे। मन्त्री थापाले भने,‘पुष्पकमल दाहाल प्रचण्डजी प्रधानमन्त्री भएदेखि नै हामीलाई सरकारमा आउन आग्रह गर्नुभएको थियो, तर हामीले अहिले आवश्यक छैन भनेर भनेको थियौं। तर एकता महाधिवेशन सम्पन्न भएलगत्तैपनि मलाई उहाँले सरकारमा सहभागीताको लागि आग्रह गर्नुभएकै हो। अहिले सरकारको स्थायित्वमाथि गम्भीर प्रश्न चिन्ह खडा भएकोले र चुनावको सुनिश्चितता र संविधान कार्यान्वयनको लागि हामी सरकारमा सहभागी भएका हौं।’
सरकारले निर्वाचनको मिति घोषणा गरेदेखि नै आफ्नो पार्टीले स्वागत गरेको उल्लेख गर्दै थापाले भने,‘निर्वाचनलाई सफल बनाउन हाम्रो पार्टीले चुनावको सबैभन्दा पहिले स्वागत गरेको हो। सरकारको स्थायित्वको बारेमा प्रश्न चिन्ह खडा हुन थालेपछि प्रधानमन्त्री प्रचण्ड र काँग्रेस सभापति शेरबहादुर देउवाले राप्रपाबाट शीर्ष नेताहरुबाटै सरकारमा आउनुपर्यो भनेर फेरि आग्रह गर्नुभएकोले हामी सरकारमा सहभागी भएका हौं।’ उनले निर्धारित समयभित्रै चुनाव गर्ने शर्त र आधारमा आफूहरु सरकारमा सहभागी भएको पटक–पटक जिकिर गरे।
थापाले अब बैशाख ३१ गते नै निर्वाचन हुनेमा कसैले पनि कुनै शंका तथा उपशंका गर्न नहुने बताए। उनले भने,‘निर्वाचन सम्पन्न गर्न युद्धस्तरमा काम भैरहेको छ। निर्वाचन आयोगलाई सबै सामाग्री जुटाईदिन्छौं।’ उनले अघि थपे,‘चुनाव निश्चित रुपमा हुन्छ, अब सबैलाई चुनावमा जुट्नको लागि म आग्रह गर्दछु।’
उनले लामो समयपछि स्थानीय तहको निर्वाचन हुन गैरहेकोले मधेश केन्द्रित आन्दोलनरत दलहरुलाईपनि चुनावमा सहभागिता गराउनुपर्ने बताए। उनले भने,‘मधेशी मोर्चालाईपनि सम्मानजनक ढंगबाट निर्वाचनमा सहभागी बनाउने वातावरण बनाउन हरसम्भव प्रयास भैरहेको छ।’ उनले थपे,‘मैलेपनि जिम्मेवारी बहन गरेसँगै वार्ता तथा छलफललाई गम्भीर रुपमा अघि बढाएको छु।’
त्यस्तै उनले निर्वाचन आयोगले दिएको निर्देशन बमोजिम तोकिएकै मितिभित्र कर्मचारी खटनपटन मन्त्रालयले गर्ने विश्वास दिलाए। उनले भने,‘निर्वाचन आयोगलाई पूर्ण सहयोग गर्न सरकार तथा विभागीय मन्त्रालयको हिसावले हामी तयार छौं।’
उनले स्थानीय तहको प्रतिवेदन सार्वजनिक गर्नु नै अभूतपूर्व उपलब्धि भएको टिप्पणी गरे। उनले भने,‘स्थानीय तहको प्रतिवेदन सार्वजनिक भएको छ, यसमा उमंग र हलचल आउनुपर्ने थियो, यसलाई पूर्णता दिनको लागि निर्वाचन हुँदैछ।’ उनले भोलि एक विशेष सार्वजनिक कार्यक्रम गरेर ललितपुर उपमहानगरपालिको प्रधानमन्त्री पुष्पकमल दाहाल प्रचण्डले उद्धघाटन गर्ने त्यहीँबाट ७४४ तह कार्यान्वयनमा ल्याउने उद्धघाटन हुने जानकारी दिए।
त्यस्तै उनले तोकिएकै मिति ०७४ बैशाख ३१ गते चुनाव नहुने भयो भने सबैभन्दा पहिले आफ्नो पार्टी सरकारबाट बाहिरिने बताउँदै भने,‘चुनाव नहुने भयो भने हाम्रो पार्टी एक मिनेटपनि सरकारमा बस्दैन।’