बिहिबारदेखि शुरू हुन लागेको माध्यमिक शिक्षा परिक्षा एसइई परिक्षामा रुपन्देहीबाट गत वर्षको एसएलसीमा भन्दा पाँच हजार बढी विद्यार्थी सहभागी हुँदैछन् । एसएलसी परीक्षा प्रणाली हटेपछि पहिलो पटक शुरु हुन लागेको कक्षा १० को माध्यमिक शिक्षा परीक्षा (एसइई)मा रुपन्देहीबाट १८ हजार २ सय ५ परिक्षार्थी सहभागी हुँदैछन्।
जसमध्ये नियमित १७ हजार ५ सय १०, र आंशिक ग्रेड वृद्धि गर्ने ५ सय ६८ विद्यार्थी रहेका छन् । यसैगरी प्राविधिक तर्फ १ सय २७ जना परिक्षार्थी रहेका छन् ।
अघिल्लो वर्षको एसएलसी परिक्षामा रुपन्देहीबाट नियमित तर्फ १२ हजार ७ सय ७८ परिक्षार्थीले एसएलसी परिक्षा दिएका थिए । परीक्षामा १ सय ४१ सामुदायिक र १ सय ४९ संस्थागत विद्यालयका विद्यार्थी सहभागी हुने जिल्ला शिक्षा कार्यालयले जनाएको छ ।
परीक्षाका लागि ५२ केन्द्रको व्यवस्था गरिएको छ। जसका लागि केन्द्राध्यक्ष, सहायक केन्द्राध्यक्ष, निरीक्षक, सहयोगी र सुरक्षाकर्मीसहित १ हजार ६ सय जनशक्ति परिचालित हुने जिल्ला शिक्षा अधिकारी टेकबहादुर थापाले जानकारी दिए।
परीक्षाका लागि आवश्यक प्रश्नपत्रहरू सम्बन्धित प्रहरी चौकी, उत्तरपुस्तिका लगायत परीक्षा सञ्चालनका लागि आवश्यक सम्पूर्ण सामग्री सम्बन्धित केन्द्रमा पुर्याई सकिएको थापाले बताए।
यस वर्षको कक्षा १० को परीक्षामा देशभरको कुल विद्यार्थी सङ्ख्या घटेको भएता पनि रुपन्देहीमा भने विद्यार्थी संख्या बढेको छ। यस वर्षको परीक्षामा देशभरबाट ५ लाख ३८ हजार १ सय ८२ जना परीक्षार्थी सहभागी हुँदैछन्। जसमध्ये नियमित चार लाख ६८ लाख चार सय, एक्जाम्टेड १८ हजार नौं सय ९ र आंशिक ग्रेड वृद्धि गर्ने ५० हजार आठ सय ७३ विद्यार्थी रहेका छन्।