बार्सिलोनालाई दुई पल्ट च्याम्पियन्स लिगको उपाधि दिलाएका पेप ग्वार्डिओलाको इङ्लिस क्लब म्यानचेस्टर सिटीलाई पहिलो वर्षको आगमनमा युरोपको प्रतिष्ठित प्रतियोगिता जिताउने अभियान समाप्त भएको छ।
फ्रेन्च क्लब मोनाकोसँग उसको घरेलु मैदानमा खेलिएको दोस्रो लेगको खेलमा ३–१ को नतिजा सुम्पिदैँ सिटी प्रतियोगिताबाट बाहिरिएको हो। दुवै लेगको खेलको नतिजा जोड्दा ६–६ गोल भएपनि मोनाको ‘अवे’ खेलमा बढि गोल गरेको आधारमा क्वाटरफाइनल प्रवेश गर्यो। मोनाकोले इङ्लिस क्लबविरुद्ध पहिलो लेगमा पराजय भोगेपनि ५–३ गोलको नतिजा निकालेको थियो। जुन फ्रेन्च क्लबलाई आज क्वाटरफाइनल प्रवेश गर्ने माध्यम बन्यो।
ग्वार्डिओलाको सयौं युरोपेली खेलको रुपमा रहेको यस खेलमा ७७ मिनेटमा थोमस लेमेरको फ्रिकिकमा ताइमोये बाकायोकोले हेडिङ गोल गर्दै सिटीको क्वाटरफाइनल पुग्ने सपना धरासायी पारे। उनले खेल सकिन १३ मिनेट बाँकी रहँदा गरेको यही गोल सिटीका लागि घातक बन्न पुग्यो।
मोनाकोले पहिलो हाफमा २ गोल फर्काइसकेको थियो। खेल सुरु भएको ८ मिनेटमा १८ वर्षीय केलियन एमबापेले गोल गरेका थिए। दोस्रो गोल डिफेन्सिभ मिडफिल्डर फाबिन्हो टाबारेजले २९ मिनेटमा गरेपछि फ्रेन्च क्लबको क्वाटरफाइनलमा पुग्ने सम्भावना सुनिश्चित भएको थियो। पहिलो हाफमा मोनाकोले खेललाई ५–५ को स्थितिमा पुर्याइसकेको थियो।
तर, दोस्रो हाफको ७१ मिनेटमा लेरोय सानेले गोल गर्दै सिटीलाई पुनः अग्रता दिलाए। यस अवधिमा सिटीले गोलको थुप्रै सम्भावना पनि गुमाएको थियो। सर्गेइ अगुइरो सानेले गोल गर्नुअघि ‘वान भर्सेस वान’ को अवस्थामा गोल गर्नबाट चुके। मोनाकोका गोलरक्षक डानिजेल सुबासिक आजको खेलमा निकै व्यस्त देखिए। उनले सिटीको केही राम्रो सम्भावनालाई भताभूङ पारे।
सिटीले गोल फर्काएको ६ मिनेटपछि पेनाल्टी एरिया नजिकैबाट बाकायोकोले गरेको हेडिङ गोल इङ्लिस क्लबका लागि दूर्भाग्य बन्न पुग्यो। सिटीको पराजयपछि लेस्टर सिटीमात्र च्याम्पियन्स लिगको क्वाटरफाइनलमा पुग्ने टोली बन्न पुगेको छ। लेस्टर हिजो बिहान क्वाटरफाइनल प्रवेश गरेको थियो।
