साढे ३३ किलो सुन तस्करीमा पक्राउ परेका नेपाल प्रहरीका एसएसपी श्याम खत्री २ लाख धरौटी बुझाएर रिहा भएका छन्।
जिल्ला अदालत काठमाडौंका न्यायाधीश दीपेन्द्र अधिकारीको इजलासले सुन तस्करहरुलाई सघाएको भन्दै खत्रीसँग २ लाख धरौटी माग गरेको थियो। रकम बुझाएर उनी रिहा भएका हुन्। सिआइबीले संगठित अपराधमा सुन तस्करमा सम्लग्नहरुलाई अदालतमा मुद्दा दायर गरेको थियो ।
उनीसँगै सुन पसल संचालक सपन श्रेष्ठ, मनोज श्रेष्ठ, सुनिल श्रेष्ठ र राजेश शाक्य एक एक लाख धरौटी बुझाएर रिहा भएका छन्।
युएइबाट सुन बोकेर आउने गोपाल बहादुर शाही, दिलबन्धु थापा, सन्तोष काफ्ले तथा त्रिभुवन भन्सारका कर्मचारी श्रीनारायण यादव,राजकुमार ढकाल र श्यामकृष्ण श्रेष्ठलाई भने अदालतले पुर्पक्षका लागि थुनामा राख्ने आदेश सुनाएको छ।
सुन मालिक हरिशरण खड्का भने अहिलेसम्म पक्राउ परेका छैनन् । हाल उनी दुबइमा छन्। गत पुस २१ गते युएइबाट नेपाल आएका शाहीको साथबाट सिआइबीले साढे ३३ किलो सुन बरामद गरेको थियो।