प्रमुख प्रतिपक्ष नेकपा एमालेले आर्थिक अपराध गरेको आरोप लगाउँदै अर्थमन्त्री कृष्णबहादुर महराको राजीनामा माग गरेको छ । व्यवस्थापिका संसदको आईतबार बसेको बैठकमा विशेष समय लिएर बोल्दै प्रमुख प्रतिपक्ष एमालेका सांसद राजेन्द्रप्रसाद पाण्डेले एनसेललाई करबाट उन्मुक्ति दिने काममा लागेका अर्थमन्त्रीलाई पदमा रहिरहने नमिल्ने जिकीर गरेका हन्। सांसद पाण्डेले ऐनसेललाई ३३ अर्व कर तीर्नबाट उन्मुक्ति दिने काम सरकारबाट भएको हो भने अर्थमन्त्री महराले राजीनामा दिनैपर्ने भन्दै आक्रोश पनि व्यक्त गरे।
सांसद पाण्डेले सरकारले जथाभावी बजेट बाँडेर स्थानीय तहको निर्वाचनलाई प्रभावित तुल्याउने खोजेको अरोप पनि लगाए। चितवन, रुकुम र रोल्पामा अरवौंको बजेट बाँडने काम सरकारबाट भएको उनको आरोप छ । सांसद पाण्डेले राष्ट्रिय गौरवको आयोजना निर्माण कार्यलाई अघि बढाउन नसक्ने सरकारले आर्थिक अनुशासनविपरित बजेट विनियोजन गर्ने गरेको भन्दै तत्काल बन्द गर्न पनि चेतावनी दिए।
बैठकमा बोल्दै सत्तासाझेदार नेपाली कांग्रेसका सांसद सकलदेव सुतिहारले मधेशवादी दललाई पनि स्थानीय तहको निर्वाचनमा सहभागी गराउने वातावरण निर्माण गर्न सरकारसँग माग गरे। उनले सबैलाई समेटेर निर्वाचनमा लैजान नसके मुलुक गम्भिर दुर्घटनामा फस्न सक्ने चेतावनी पनि दिए। नेपाली काँग्रेसका मधेश केन्द्रित सांसदहरुले मधेशको माग सम्बोधन गर्न पनि पहिले संविधान संशोधन गरेर जानुको विकल्प नरहेको बताउँदै आएका छन्।
नेकपा माओवादी केन्द्रका सांसद सूर्यप्रकाश बाला राईले भारतीय सुरक्षाकर्मीको गोली लागि निधन भएका सहिद गोविन्द गौतमको परिवारलाई भारत सरकारबाट क्षतिपूर्तिको व्यवस्था गर्न सरकारसँग माग गरे। उनले भारतले सो घटनाका सम्बन्धमा माफी माग्नुपर्ने पनि उल्लेख गरे।
मधेश केन्द्रित दलका नेताहरुले भने बैठक बहिष्कार गरेका थिए। संविधान संशोधन प्रस्ताव परिमार्जनसहित पारित गर्न माग गर्दै मोर्चाले संसद बैठक बहिष्कार गर्दै आएको छ। संसदको अर्को बैठक सोमबार १ बजे बस्ने संसद सचिवालयले जनाएको छ ।