भारतीय ब्याट्सम्यान चेतेश्वर पुजारा टेस्ट क्रिकेटमा तेस्रो पल्ट दोहोरो सतक बनाउन सफल भएका छन्। अस्ट्रेलियाविरुद्ध राचीमा भइरहेको तेस्रो टेस्टको चौथो दिन आइतबार पुजाराले २ सय २ रन बनाएपछि भारतले ९ विकेटको क्षतिमा ६ सय २ रन बनाएर इनिङ समाप्तीको घोषणा गर्यो। पहिलो इनिङमा अस्ट्रेलियाले ४ सय ५१ रन बनाएको थियो।
पुजाराको अस्ट्रेलियाविरुद्ध यो दोस्रो दोहोरो सतक थियो। उनले कङ्गारुविरुद्ध ११ टेस्टमा एक हजार रन पनि पुरा गरेका छन्। उनी पूर्व ब्याट्सम्यान सचिन तेन्दुलकर र राहुल द्रविडपछि अस्ट्रेलियाविरुद्ध हजार रन बनाउने भारतीय ब्याट्सम्यान बन्न पुगे।
पुजाराले इङ्ल्यान्डविरुद्ध पनि हजार रन पुरा गरेका छन्। पुजारा अस्ट्रेलियाविरुद्ध टेस्टको एउटै इनिङमा ५ सयभन्दा बढि बल खेल्ने तेस्रो ब्याट्सम्यान बन्न पुगेका छन्। पछिल्लो पल्ट १९६४ मा इङ्ल्यान्डका केन बेरिङटनले ओल्ड ट्राफोड टेस्टमा २ सय ५६ रन बनाउने क्रममा ६ सय २४ बल खेलेका थिए।
अस्ट्रेलियाविरुद्ध यो कीर्तिमान यसअघि इङ्लिस ब्याट्सम्यानले मात्र बनाएका थिए। जसमा लेन हटनले ३ सय ६४ रन बनाउने क्रममा ८ सय ४७ बल खेलेका थिए। वाली हेमन्ड्सले तीन पल्ट कङ्गारु बलरको ५ सयभन्दा बढि बल खेलेका थिए।
पुजारा इङ्लिस ब्याट्सम्यानपछि पहिलो बाहिरी खेलाडी हुन्, जसले एउटै इनिङमा ५ सयभन्दा बढि बल खेले। उनले २ सय २ रन बनाउने क्रममा ५ सय २५ बल खेलेका थिए। पुजाराले पहिलो श्रेणी क्रिकेटमा ११ पल्ट दोहोरो सतक बनाइसकेका छन्।
