नेपाल विद्युत प्राधिकरणका प्रबन्ध निर्देशक कुलमान घिसिङले आफूले प्राधिकरणमै बसेर गर्ने कामनै देशका लागि धेरै ठूलो हुने बताएका छन्।
सामाजिक सञ्जालमा घिसिङलाई आगामी चुनावमा काठमाडौंको मेयरमा उठाउनुपर्ने भनी चलेका चर्चाका बारेमा सेतोपाटीले सोधेको प्रश्नमा घिसिङले त्यो विषयमा आफूलाई कुनै रूची नभएको बताए। ‘मलाई त्यतातिर रुची छैन,’ घिसिङले भने, ‘जतिबेलासम्म प्राधिकरणमा बस्छु मैले यहाँ गर्ने काम नै देशका लागि ठूलो काम हो। यहाँबाट निस्केको दिन अर्कै कुरा हो।’
उनले सामाजिक सञ्जालमा बत्ती आउँदा वा जाँदा मान्छेहरुले कुलमान आयो, कुलमान गयो भन्ने गरेको कुरालाई पनि सम्मानको रुपमा लिने गरेको बताए। ‘यो एउटा सम्मान हो भन्ने मलाई लाग्छ, यस्तो कुरालाई म सकारात्मक रुपमा लिन्छु।’
घिसिङसँग सेतोपाटीले गरेको विस्तृत कुराकानी मंगलबार प्रकाशित हुनेछ।