बितेको आठ महिनामा सोलुखुम्बुका १३ जनाले विभिन्न सङ्घसंस्था तथा सरकारी कार्यालयलाई जग्गादान गरेका छन्।
आव २०७३र०७४ को साउन महिनादेखि फागुन मसान्तसम्ममा १३ जना दाताले करिब २६ लाख मूल्य बराबरको जग्गा रजिष्ट्रेसन पास गरी विभिन्न सङ्घसंस्था तथा सरकारी कार्यालयलाई उपलब्ध गराएका जिल्ला मालपोत कार्यालय, सोलुखुम्बुले जनाएको छ।
जिल्ला मालपोत कार्यालय सोलुखुम्बुको तथ्याङ्कअनुसार दूधकुण्ड नगरपालिकाका फुर्वा शेर्पाले सहरी स्वास्थ्य केन्द्रका लागि १५४ वर्गमिटर जग्गा निःशुल्क उपलब्ध गराएका थिए।
त्यस्तै, बासाखाली माविका लागि दिपचन खालिङले एक हजार २१० वर्गमिटर, जिल्ला खेलकुद विकास समितिका लागि पञ्चनका भोटीमाया राईले पाँच हजार ११५ वर्गमिटर, जिल्ला वन कार्यालयका लागि दोभान हाइड्रोपावरले दुईहजार ३५ वर्गमिटर, काँकु प्रहरी चौकीका लागि चन्द्रबहादुर राईले एक हजार १५० वर्गमिटर र जनता आधारभूत विद्यालय नेलेका लागि टीकबहादुर बस्नेतले १३३ वर्गमिटर जग्गा निःशुल्क उपलब्ध गराएका छन्।
त्यस्तै, छेस्काम माविका लागि जाङमु शेर्पाले एक हजार ३५० वर्गमिटर, मदनआश्रित आधारभूत विद्यालय पावैका लागि कृष्णबहादुर राईले ८०० वर्गमिटर, भुमेश्वर आधारभूत विद्यालय सल्यान–८ का लागि भीमबहादुर मगरले ११३ वर्गमिटर, हिमालय मावि जुवुका लागि प्रेमबहादुर बस्नेतले ३७५ वर्गमिटर, पद्यमकन्या निमावि बासाका लागि गोपाल कार्कीले १०० वर्गमिटर र घरेलु तथा साना उद्योग विकास समितिका लागि नेचामा बेदनाथ बास्तोलाले ६४ वर्गमिटर जग्गा निःशुल्क उपलब्ध गर्राका हुन्।
यो जग्गाको मूल्य जिल्ला दररेट अनुसार करिब २६ लाख पर्न गए पनि स्थानीयस्तरको चलनचल्ती मूल्य अनुसार झन्डै त्यसको तेब्बर मूल्य पर्ने जिल्ला मालपोत कार्यालय सोलुखुम्बुका प्रमुख टङ्क फुयाँलले बताए।
विद्यालयलाई जग्गा दानगर्दा धर्म हुने भएकाले आफूले जग्गादान गरेको दाता कृष्णबहादुर राईले बताए । सोलुखुम्बुमा विभिन्न सरकारी तथा गैरसरकारी संस्थालाई निःशुल्क जग्गा उपलब्ध गराउने दर निकै उच्च रहेको पाइन्छ ।
अघिल्ला वर्षमा सदरमुकाममा बसपार्क तथा विभिन्न सरकारी भवन बनाउनका लागि करोडौँ मूल्यका जग्गा स्थानीयले निःशुल्क उपलब्ध गराएका थिए । सदरमुकाम तथा स्थानीय तहका केन्द्रमा जुन ठाउँमा कार्यालयको भवन बन्छ त्यसको आसपासमा बजार विस्तार भई घडेरीको मूल्य वृद्धि हुने गरेको पाइन्छ । रासस
