नयाँ शक्ति पार्टीका संयोजक बाबुराम भट्टराईले देशमा संघीयताविरोधी दुई थरी प्रवृत्ति अगाडि देखा परेको बताएका छन्। उनले देशमा दुई वटा विखण्डनका बीउ रोप्ने काम भइरहेकाले त्यसको समाधान संघीयताको प्रवर्धन भएकाले यसतर्फ अगाडि बढ्न पार्टीको जन्म भएको बताएका छन्।
पार्टीको हिमाल, पहाड, तराई–मधेस राष्ट्रिय अभियानको प्रस्तावित प्रदेश नं. २ अन्तर्गत महोत्तरीको बर्दिवासमा आयोजित सभालाई सम्बोधन गर्दै पूर्वप्रधानमन्त्री समेत रहेका भट्टराईले एकातिर एकात्मक राज्य राख्ने प्रवृत्तिले संघीयताको बाटो छेकिरहेको र अर्कोतिर सीके राउतजस्ता पृथक प्रवृत्ति देशमा विखण्डनको बीउ रोप्न उद्यत रहेको उनले बताए।
‘एमाले अध्यक्ष केपी ओलीले घुमाएर प्रकारान्तरले विखण्डनको बीउ रोपिराखेका छन भने सीके राउतले खुलेआम रूपमा त्यसको वकालत गरिराखेका छन्,’ उनले भने ।
उनले शेष नागका हजार जिब्रा छ भन्ने कुरा थाहा छ तर प्रचण्डजीका कति जिब्रा छन भन्ने कुरा ३० वर्ष सँगै राजनीति गर्दा पनि आफूले थाहा पाउन नसकेको बताए।
‘प्रचण्डले बिहान एउटा कुरा गर्छन् साँझ बिहानको कुरो बदलिने गरेकाले उनको बोलीमा विश्वास गर्न सकिन्न,’ उनले भने, प्रचण्डसँग चुनाव अगावै संविधान संशोधन हुन्छ भन्ने कुरामा आश गर्नुहोस् तर भर नपर्नुहोस्।’
प्रचण्डप्रति खनिएका बाबुरामले कट्टाक्ष गर्दै भने, ‘मधेसमा आएर मधेसीसँग लभ पर्यो भनेर प्रचण्डले भन्छन्। काठमाडौं गएर केपी ओलीसँग बिहे गर्छन्,’ नेता भट्टराईले थपे, ‘म त स्पष्ट छु हिसिला यामीसँग मैले प्रेम गरेँ। विवाह पनि हिसिला संगै गरेँ। तर हामी प्रचण्ड जस्तो दुई जिब्रे होइनौं।’
उनले संविधान संशोधन नगरेर स्थानीय निकायको चुनाव गरे देश गम्भीर खतरामा फस्ने औंल्याएका छन्। उनले प्रदेशको सीमाकंन सहितको संविधान संशोधन गर्नुपर्छ। उनले भने संविधानको मुख्य घाउ भनेको संघीयता, राज्यको पुनर्संरचना सीमांकनको विषय नै भएकाले पहिला यो टुंगो लगाउनुपर्ने बताए।
‘यो काँडा नझिकेसम्म घाऊ बेला बेलामा बल्झिरहन्छ। सबैले दुःख पाउँछन्। बिझेको काँडा नझिकेसम्म घाउ निको नपारेसम्म सम्भव छैन,’उनले भने।
भट्टराईले निर्वाचन आवश्यक भएकाले संविधान संशोधनबाट संघीयता, राज्य पुर्नसंरचना र सीमांकनको मुद्दा टुंग्याएर मात्रै चुनाव गर्नुपर्ने बताए।
उनले संघीयतालाई स्थापित गर्नका लागि पहिला केन्द्रको, प्रदेश र त्यसपछि स्थानीय तहको निर्वाचन गरिनुपर्ने बताए। ‘ती तीनै निकायको चुनाव गर्न भ्याइँदैन भने तीनवटै निर्वाचन एकैपटक गर्न सकिन्छ,’ उनले भने, ‘तर, अघि चुनाव र पछि संविधान संशोधन गर्छु भन्नु छली कुरा मात्र । विपरीत ध्रुवमा गइरहेको दुई वटा डुंगामा टेकेर पारी तर्न सकिनन्।’
उनले मधेसको माग पुरा गर्नु पर्छ भन्दा आफूलाई केही खसआर्य समुदायका नेताहरु बाबुराम मधेसमा गएर मधेशी जनता उचालेर देशलाई विखण्डनको दिसामा लगिरहेको आरोप लगाउने गरेको प्रति चिन्ता व्यक्त गरे। बाबुरामलाई विखण्डवादी भन्नेहरुलाई उनले कड्किदै भने, ‘बाबुरामको डिएनए भित्र राष्ट्रियता छ । तपाईहरु भित्र राष्ट्रिता छ कि छैन हस्पिटलमा गएर डिएनए टेष्ट गराउनुस्।’
‘यो देश मेरा बाउबाजेले बनाएको हो, म राष्ट्रवादी हुँ, मेरो रगतमा, मेरो डिएनएमा राष्ट्रियता छ, म यो देशलाई बचाएर एकताबद्ध बनाएर राख्छु,’ उनले अघि भने, ‘मलाई राष्ट्रघाति भन्नेहरुको डिएनए टेष्ट गर। तिमीहरुको राष्ट्रियता के हो?’
उनले सीता, गौतमबुद्ध सबैलाई नेपाली भनेर गर्व गर्ने समुदायले मधेसमा बस्ने मधेसीलाई गैरनेपाली देख्नु नै गलत भएको बताए ।
