फाइल फोटो
दुईपटक स्थगित भएको काठमाडौँको प्रदर्शनीमार्गस्थित रत्नराज्य लक्ष्मी क्याम्पस (आरआर)मा आज स्वतन्त्र विद्यार्थी युनियन (स्ववियु)को निर्वाचन हुँदैछ।
सर्वोच्च अदालतले निर्वाचन गर्न काठमाडौँका प्रजिअ र क्याम्पस प्रशासनका नाममा चैत २ गते अन्तरिम आदेश जारी गरेपछि आरआरमा निर्वाचन हुन लागेको क्याम्पस प्रमुख डा निर्मलाकुमारी सुवालले जानकारी दिइन्।
आठ वर्षपछि यहाँ स्ववियु निर्वाचन हुन थालेको हो। आज बिहान ८ देखि साँझ ५ बजेसम्म निर्वाचनको समय तोकिएको छ। अहिले मतदान जारी छ। निर्वाचनमा करिब तीन हजार ५०० मतदाता सहभागी हुँदैछन्। फागुन १८ र २३ गते विद्यार्थी सङ्गठनबीच विवाद हुँदा त्यहाँ निर्वाचन स्थगित भएको थियो।
निर्वाचनमा अनेरास्ववियु र नेपाल विद्यार्थी सङ्घले सहभागिता जनाएका छन् भने अनेरास्ववियु क्रान्तिकारीले बहिष्कार गरेका छन्। निर्वाचनमा अनेरास्ववियुबाट तपेन्द्रबहादुर शाही र नेपाल विद्यार्थी सङ्घबाट उत्तमबहादुर साउदको प्यानलबीच प्रतिस्पर्धा भइरहेको छ।
क्रान्तिकारीका अध्यक्ष नरेन्द्र न्यौपानेले क्याम्पस प्रशासनले स्थानीय तह निर्वाचन आचारसंहिता विपरीत निर्वाचन गर्न थालेकाले निर्वाचन प्रक्रियामा सहभागिता नजनाएको जानकारी गराए।
पेट्रोल बम प्रहारः
यसैबीच रत्नराज्य लक्ष्मी क्याम्पसमा भइरहेको स्वतन्त्र विधार्थी युनियनको निर्वाचनलाई अवरोध पु¥याउने उद्देश्यले केहि विद्यार्थीको एक समूहले त्यहाँ पेट्रोल बम प्रहार गरेको छ।
प्रहरीका अनुसार निर्वाचनबाट असन्तुष्ट रहेका विद्यार्थीको समूहले दुईवटा सिसीमा पेट्रोल राखेर पड्काएका हुन्। सो आक्रमण कसले गरेको भन्नेबारेमा अनुसन्धान भइरहेको महानगरीय प्रहरी परिसरका प्रमुख छविलाल जोशीले जानकारी दिए। आक्रमणबाट कसैलाई पनि केही क्षति नभएको बताइएको छ।
अहिले आरआर क्याम्पस र वरिपरिका क्षेत्रमा सुरक्षा व्यवस्था कडा पारिएको परिसरका प्रमुख जोशीले जानकारी दिए । रासस
