स्थानीय तहको नयाँ संरचना अनुसार प्रदेश नं ४ भित्रका स्थानीय निकायका अधिकृतका लागि स्थानीय तहको शासन सञ्चालन तथा व्यवस्थापन सम्बन्धी तीन दिने अभिमुखीकरण आजदेखि पोखरामा सुरु भएको छ।
सङ्घीय मामिला तथा स्थानीय विकास मन्त्रालय र स्थानीय विकास प्रशिक्षण प्रतिष्ठानको संयुक्तरुपमा आयोजित अभिमुखीकरणमा प्रदेश नं– ४ भित्रका जिल्लाका स्थानीय विकास अधिकारी र गाउँ तथा नगरपालिकाका कार्यकारी अधिकृतको सहभागिता छ।
मन्त्रालयका सहसचिव मधुसुदन बुर्लाकोटीले तीन दिने अभिमुखीकरणका क्रममा रुपान्तरित संरचनाअनुसार स्थानीय तहबाट गर्नुपर्ने कामका साथै यस क्रममा आउने कठिनाइलगायतका विषयमा छलफल गरिने बताए।
मन्त्रालयका उपसचिव विष्णुदत्त गौतमले अभिमुखीकरणमा सङ्घीयता र स्थानीय शासन, सेवा प्रवाह तथा वातावरण व्यवस्थापन, समाजिक सुरक्षा, ‘ई’ गभर्नेन्स, स्थानीय तहको सङ्क्रमणकालीन योजना, प्रक्रिया र कार्यान्वयन लगायतका विषयमा छलफल गरिने बताए।
उपसचिव प्रदिपकुमार निरौलाले राज्य रुपान्तरणको आभास सर्वसाधारणलाई दिने दायित्व स्थानीय तहका कर्मचारीमा आएको बताउँदै सेवा प्रवाहलाई प्रभावकारी बनाउनका लागि सो कार्यक्रम गरिएको बताए। रासस
