एउटै वस्तुलाई फरक–फरक ठाउँबाट आँखा लगाउँदा दृश्य पनि फरक–फरक देखिन्छन्। धुर्मुस–सुन्तलीले मंगलबार आफैंले बनाएको मुसहर बस्तीको फरक दृश्य पहिलोपटक देख्न पाए।
भुइँचालोपछि काभ्रेको पहरीगाउँ र सिन्धुपाल्चोकको गिरानचौरमा बस्ती बसाल्दै गर्दा उनीहरुले बेलाबेला फरक–फरक दृश्य देख्न पाइरहन्थे। किनकि, त्यहाँ वरिपरि पहाड थियो। चाहेको बेला डाँडा चढेर बन्दै गरेको बस्तीको नौला–नौला दृश्य देख्न पाउँथे। यसपालि भने उनीहरुका लागि त्यो मौका ढिलो आयो। किनकि, समथर भू–भागमा बनाइएको बस्तीलाई माथिबाट नियाल्ने ठाउँ थिएन।
यसै साता बस्तीका कुल ५३ वटा घरको रंगरोगन सकिएपछि ‘भ्यु टावर’ को निर्माण सुरु भयो। ३० फिट अग्लो टावरको मंगलबार बीस फिटसम्मको काम सकियो। मिस्त्रीहरुले धुर्मुस–सुन्तलीलाई टावर नबन्दै माथिबाट नियाल्न आग्रह गरे। बुधबार तीस फिटकै टावर सकिएको छ।
तीन वर्षे छोरी र परिवारको हेरविचार तथा 'मेरी बास्सै' निर्माण/निर्देशन सम्हाल्न लागि काठमाडौंमा रहेकी सुन्तली र बस्ती बनाउन महोत्तरी रहेका धुर्मुसबीच सोमबार झन्डै दुई हप्तापछि भेट भयो। दुवैले टावरबाट बस्ती नियाले। तल झरे र बिभिन्न मुद्रामा फोटो खिचाए। अधिकांश तस्बिरमा उनीहरु हाँसो र प्रसन्न मुद्रामा देखिन्छन्। आफ्नो फेसबुकमार्फत् तस्बिर सार्वजनिक गर्दै धुर्मुसले लेखेका छन्-
'राम्रो गर्नु पर्छ। सकारात्मक सोच राख्नुपर्छ भन्ने यिनी कस्ती?
सायद त्यही सोचले ठडियो एकिकृत नमुना मुसहर बस्ती।'
‘बस्तीको काम लगभग सकिएको छ,’ सेतोपाटीसँगको फोनसम्पर्कमा धुर्मुसले भने, ‘अब कम्युनिटी हलमा छाना लगाउन मात्र बाँकी छ। २५ गतेसम्म काम सक्नुपर्छ भनेर खटिरहँदा पनि नसकिएला कि भन्ने अत्यास थियो। टावरमा चढेर हेर्दा अत्यास बिलाएर मनमा खुसी भरिएको छ।’
धुर्मुसका अनुसार टावर बस्तीको आकर्षण हो। पर्यटकीय गन्तव्य बनाउने लक्ष्यअनुरुप बस्ती निर्माण गरिएकाले टावरबाट बर्दिवास, लालबन्दी, ढल्केबर, जनकपुरसम्मका दृश्य नियाल्न सकिने उनको भनाइ छ।
धुर्मुसका भनाइमा नयाँ वर्षका दिन बिहान आठ बजे बस्ती हस्तान्तरण हुनेछ। मुसहर परिवारका लागि ५० वटा, मगर, सुनार र भुजेल परिवारका लागि एक–एक वटा गरी कुल ५३ वटा घर तयार भएको छ। प्रत्येक घरमा एक बगैंचा, गाडी जाने बाटो, एक शौचालयसहितको बस्ती वातावरण, बाल र अपांगतामैत्री हुने धुर्मुसले बताए।
‘हामीले बस्तीको शिलान्यास गर्दा नै वैशाख १ गते हस्तान्तरण गर्नुपर्छ भनेर लेखेका थियौं,’ उनले भने, ‘हामी कुनै पनि हालतमा त्यो मितिभन्दा पर सार्न चाहँदैनथ्यौं। मुसहर दाजुभाइले तालु सेक्ने घाममा पनि ज्यान दिएर काम गर्नुभयो। बस्ती बसाल्दै गर्दा सबैभन्दा बस्ती बसाल्ने पैसा नउठ्ला कि भन्ने डर थियो। झन्डै एक महिनाअघिसम्म पनि यो डर कायम थियो। अब लगभग उठेको छ। सहयोग आउने क्रम जारी छ। तेस्रो बस्ती निर्माण गर्न सघाउनुहुने सबैलाई जति धन्यवाद दिए पनि कम हुन्छ।’
