साम्राज्ञी राज्यलक्ष्मी शाह तथा पुष्पल खड्का स्टारर ‘मारुनी’ले भदौ १३ लाई आफ्नो रलिज मिति तोकेको छ।
पुनम इन्टरटेनमेन्टको ब्यानरमा पुनम गौतमले निर्माण गर्ने सिनेमा निर्माण युनिटले बुधबार वितरणका लागि एफडी कम्पनीसँग सम्झौता गर्दै प्रदर्शन मिति ‘लक’ गरेको हो ।
एफडी प्रमुख नरेन्द्र महर्जनले निर्माता तथा निर्देशकको माग बमोजिम प्रदर्शन मिति फाइनल गरिएको बताए । ‘उहाँहरुले राम्रो फिल्म बनाउने कुरामा हामीलाई पूर्ण विश्वास छ । यही कारण हामी उहाँहरुसँग सहकार्य गर्न तयार भएका हौं,‘महर्जनले भने । निर्माता गौतमले पनि एफडीसँगको सहकार्यले सिनेमालाई लक्षित दर्शकसम्म पुर्याउन मद्दत पुग्ने विश्वास व्यक्त गरिन् ।
मिती तोकिएसँगै साम्राज्ञीको भिडन्त अनमोल केसीसँग हुने तय भएको छ। फ्लोरमा जान बाँकी अनमोल स्टारर 'ब्याचलर बन्टी'ले पनि सो मितिलाई आफ्नो रिलिज मिति घोषणा गरिसकेको छ।
स्मरणीय रहोस् साम्राज्ञीले अनमोलसँग जोडी बाँधेर 'ड्रिम्स'बाट नेपाली रजतपटमा डेब्यू गरेकी थिइन्। दुई सिनेमाको एकै रिलिज मितिले नेपाली वक्सअफिसमा हुने यी दुई उदाउँदा स्टारको भिडन्त दर्शनिय हुनेछ।
'मारूनी'का निर्देशक नवल नेपाल हुन् भने 'ब्याचलर बन्टी'लाई लगातार सिनेमा निर्देशन गरिरहेका मिलन चाम्सले निर्देशन गर्नेछन्।
