रोमाण्टिक गजलकारका रुपमा चर्चित प्रकट पंगेनी ‘शिव’ ले गृहनगर पोखरामा गजल पारखीलाई भरपुर मनोरञ्जन दिलाएका छन्। शनिबार साँझ स्थानीय साँग्रिला रिसोर्टमा ३२ जोडीले उनका गजल सुनेका हुन्।
माया, प्रेमका गजल सुन्दा जोडीहरु आपसमा हेरेर मुस्कुराउँथे। ताली बजाउँथे । र,वान्स मोर भनेर हुटिङ गर्थे। उनले वाचन गरेका सबै डेढ दर्जन गजलले वान्स मोर पाए। साँझ ७ बजे वाचन थालेका पगेनीले डेढ घन्टासम्म दर्शकलाई मन्त्रमुग्ध बनाए ।
साइकलेहरुको संस्था ‘जी नाइन’ ले उनको कार्यक्रम आयोजना गरेको थियो। कार्यक्रम सुन्नप्रति जोडीले ४ हजार रुपैयाँको टिकट काटेका थिए। टिकटमा गजल श्रबण र डिनर सुविधा दिइएको थियो।
पंगेनीको यो १६ औं एकल वाचन हो। यसअघि काठमाडौं, पोखरा, धरान, चितवन धेरैतिर उनका एकल गजल वाचन भैसकेको छ । शनिबारको कार्यक्रममा गायक हिराकाजी श्रेष्ठले तीन वटा गीत गाएर उनलाई साथ दिएका थिए।
पगेनीको १७ औं एकल वाचन सोमबार नेपालगञ्जमा हुँदैछ । लायन्स क्लब अफ नेपालगञ्ज र मलमपट्टि मर्निङ वाक ग्रुपले माघीको अबसरमा पगेनीलाई नेपालगञ्जमा निम्त्याएका हुन् । कार्यक्रम सोमबार साँझ स्थानीय सिद्धार्थ कजेटमा हुनेछ । आयोजक डा. बद्रि चापागाइँका अनुसार करिब ३ सय दर्शकले गजल सुन्ने अनुमान गरिएको छ ।