जनकपुरधाममा दोस्रो जनकपुर साहित्य कला एवं अन्तर्राष्ट्रिय नाटक महोत्सव हुने भएको छ।
मैथिली विकास कोष जनकपुरधामको आयोजनामा आगामी फागुन १८ गतेदेखि हुन लागेको ६ दिवसीय महोत्सवको उद्घाटन नेपाली कांग्रेसका सभापति शेरबहादुर देउवाले गर्नेछन्।
कोषले सोमबार पत्रकार सम्मेलन आयोजना गरी महोत्सवमा नेपाल, भारत, बंगलादेश, अफगानिस्तानसहित विभिन्न चार देशले सहभागिता जनाउने आयोजकले जनाएको छ।
महोत्सवमा विभिन्न ६ भाषामा नाटक प्रस्तुत गरिनेछ। महोत्सव मैथिली भाषामा केन्द्रित भई प्रदेशको सांस्कृतिक परिचय, भाषा र जातीय विभाजनका प्रभाव, भाषा साहित्य संरक्षणमा चुनौती, मातृभाषा संस्कृति र युवा, मैथिली फिल्मको सम्भावना, स्थानीय तहमा मातृभाषा शिक्षण, केन्द्रिकृत पत्रकारिता र मिथिला, प्रदेशको भाषा र नामकरण, मिथिला समाजमा महिलाको सामाजिक तथा सांस्कृतिक भूमिकाबारे नेपाल–भारतका विज्ञबीच संवाद तथा छलफल समेत हुनेछ।
कोषका अध्यक्ष जीवनाथ चौधरीका अनुसार महोत्सवमा मिथिला र मैथिलीमा केन्द्रित भई साँस्कृतिक कार्यक्रमका साथै मिथिला भोजन, पुस्तक प्रदर्शनी, लोककला र ललितकलासमेत प्रदर्शन गरिनेछ।
कोषका अध्यक्ष जीवनाथ चौधरीले प्रदेश दुईको सरकार गठन भएको एक वर्षभन्दा बढी भए पनि अहिलेसम्म प्रदेशको नामाकरण र स्थायी राजधानीबारे कुनै टुंगो लाग्न नसकेकाले महोत्सवको आयोजनाले सहयोग पुग्ने दाबी गरे।
उनले भने, ‘प्रदेश दुईका जनताहरू राजनीतिक, भाषिक, साँस्कृतिक र सामाजिक अन्तरद्वन्द्वबाट गुज्रिरहेका छन्, यस स्थितिमा यस्ता विषयउपर हुने गहन विचार विमर्शले महत्वपूर्ण भूमिका खेल्नेछ ।’
१८ लाखको लागतमा हुन लागेको महोत्सवमा प्रदेश दुईको सरकारले १० लाख रुपैयाँ आर्थिक सहयोग गरेको छ।