नेपाली निर्देशक मीनबहादुर भामले बनाउन लागेको 'द इयर अफ कोल्ड' (चिसो वर्ष) ले फिल्म निर्माण निम्ति ५३ हजार युरो (६६ लाख रूपैयाँ) प्राप्त गरेको छ।
नर्वेजियन फिल्म इन्स्टिच्युटको सरफन्ड कोषअन्तर्गत भामको नयाँ फिल्मले उक्त पुरस्कार जितेको हो। विश्वभरका ५२ फिल्मकर्मीले आफ्नो स्क्रिप्ट प्रतिस्पर्धामा राखेका थिए। भामको अघिल्लो फिल्म 'कालो पोथी' ले पनि यस्तै पुरस्कार जितेको थियो।
नर्वेजियन पर्यटन मन्त्रालय मातहतको सरफन्ड कोषले ८५ मुलुकलाई फिल्म निर्माणमा सहयोग गर्छ। यसले खासगरी राजनीतिक र आर्थिक रूपमा फिल्म बनाउन अप्ठ्यारो अवस्थाका मुलकलाई सहयोग गर्दै आएको छ।
'चिसो वर्ष' मा एउटी गर्भवती श्रीमतीले हराएको श्रीमानको खोजी गर्ने कथा समेटेको छ। हराएका श्रीमान खोज्ने क्रममा एउटा बौद्ध भिक्षु र श्रीमतीको जीवनमा आउने परिवर्तन फिल्मको कथा हो।
पितृसत्तात्मक समाजमा एक महिलाले पहिचानका लागि गर्नुपर्ने संघर्षलाई मिहीन रूपमा प्रस्तुत गरेको भन्दै 'चिसो वर्ष' पुरस्कृत भएको निर्णायक मण्डलले जनाएको छ। यसमा मुख्य पात्रको यात्राका माध्यमबाट नेपालको जीवन जिउने कला र समृद्ध सांस्कृतिक विशेषता चित्रण गरिएका छन्।
निर्णायक मण्डलले 'चिसो वर्ष' सँगै अन्य पाँच फिल्म पनि सहयोगका लागि छनोट गरेको छ। यसमा दुई वृत्तचित्र तथा चार कथानक फिल्म छन्।
२०७४ सालमै घोषणा भएको 'चिसो वर्ष' ले सन् २०१८ मा स्विट्जरल्यान्डको लोकार्नो फिल्म फेस्टिभलमा ६ हजार युरो जितेको थियो। त्यस्तै, एसिया सिनेमा फन्डअन्तर्गत १० हजार अमेरिकी डलर पनि जितेको थियो।
त्यस्तै, अफगानिस्तानको 'द पोस्टम्यान', चीनको 'द स्ट्रेन्जर', इजिप्टको 'एज आई वान्ट', दक्षिण अफ्रिकाको ‘हाउ टु स्टिल अ कन्ट्री’ पनि पुरस्कृत भएका छन्।
