निर्देशक विनोद पौडेलको दोस्रो फिल्मको स्क्रिप्ट एसियन प्रोजेक्ट मार्केट (एपीएम)मा छनोट भएको छ ।
विश्वभरका ६० देशबाट प्राप्त ३८४ वटा स्क्रिप्टबाट पोडेलको स्क्रिप्ट अन्तिम २९ मा अटाएको हो । भुटानी शरणार्थीको कथामा बन्ने फिल्मलाई पौडेलले ‘एक्रोन इन्टरनेसनल’ नाम दिएका छन् ।
एसियाका सिनेकर्मीलाई विश्व सिनेमासम्म पुर्याउने उद्देश्यले सुरु भएको एपीएममा यो साल राजेश खत्रीले बनाउन लागेको श्याम श्वेत तस्बिर पनि छनोट भएको छ ।
यो फिल्मलाई मिन भामले निर्माण गर्न लागेका हुन् । ‘एक्रोन इन्टरनेसनल’लाई भने यातिन पर्खानीले बनाउन लागेका हुन् ।
एपीएममा छनोट भएका सिनेमाका निर्देशकले विश्वभरबाट भेला भएका निर्मातालाई आफ्नो कथा सुनाउनेछन् । यसरी सुनाएका कथा निर्माताले मनपराएमा लगानीमा उनीहरूले सहकार्य गर्नेछन् ।
विनोदले आफ्नो चलचित्र निर्माणका लागि सवा पाँच करोड रुपैयाँ लाग्ने बताएका छन् ।
‘बुलबुलको तुलनामा अलि महंगो फिल्म हो यो । एक्लैले लगानी गर्न सक्ने अवस्था थिएन । एपीएममा छनोट भएपछि निर्माता खोज्ने बाटो सहज भएको छ,’पौडेलले भने ।
गत वर्ष विनोदले निर्देशन गरेको चलचित्र ‘बुलबुल’ ले सार्क फिल्म फेस्टिभलमा अभिनेत्री तर्फ क्रिटिक्स अवार्ड प्राप्त गर्न सफल भएको थियो ।
नेपालमा पनि फिल्मले निर्देशन र अभिनेत्री गरी दुई विधामा राष्ट्रिय अवार्ड प्राप्त गरेको थियो ।