र्यापर सुदिन पोखरेलले साढे सात वर्षपछि नयाँ गीत 'जोश' सार्वजनिक गरेका छन्। संगीत र पत्रकारितामा सक्रिय उनी अष्ट्रेलिया गएको साढे सात वर्षपछि सार्वजनिक गीत जोश मार्फत पुनरागमन गरेका हुन्।
युट्युब मार्फत सार्वजनिक गीतमा सुदिनकै स्वर, शब्द र संगीत छ। सुदिन आफैं फिचर भएको गीतको भिडियो विवरणमा लेखिएको छ- यो मेरो कथा हो। गीतमा कलाकारको संघर्ष र संगीत क्षेत्रभित्रको विकृतिमाथि व्यंग्य गरिएको छ। गीतमा देश छोडेर परदेश भासिनुको पीडादेखि साथीभाइको सम्झनासमेतको कुरा समेटिएको छ।
सुगम पोखरेलसँग मिलेर संगीत क्षेत्रमा यात्रा थालेका सुदिन गिरीश-प्रनिल र द युनिटीसँग जोडिएर र्याप गाएपछि थप चर्चामा आएका थिए। 'मलाई भोट देऊ', 'सि इज द बम', ‘म यस्तो छु, म उस्तो छु’, ‘आँखाभरि नाच्छौ’ आदि उनका चर्चित गीतहरु हुन्।
नयाँ एल्बमको तयारीमा रहेका उनले 'जोश' शीर्षककै गीत सार्वजनिक गरेर नयाँ जोशका साथ संगीतमा सक्रिय हुने संकेत देखाएका छन्।
