नेपाली सिनेमा क्षेत्रमा महिला कलाकारमाथि हुने आर्थिक शारीरिक शोषणबारे अनौपचारिक चर्चा धेरै सुन्न पाइन्छ।
तर सोमबार अभिनेत्रीहरू नायिका रेखा थापा, स्वस्तिमा खड्का र लक्ष्मी बर्देवाले यसबारे औपचारिक चर्चा गरे।
नेपाल लाइभका पत्रकार डिबी खड्का 'नियत' किताब सार्वजनिक गर्दै उनीहरूले सिनेमा क्षेत्रमा आफूहरूले पटकपटक खराब नियत भएकाहरूको सामना गर्नुपरेको बताए। उनीहरूले किताबभित्रका धेरै कुरा आफूले भोग्नु नपरे पनि सुनेको वा देखेकै कुरा भएको बताए।
किताबबारे बोल्दै नायिका रेखा थापाले भनिन्, 'समाजका अरु क्षेत्रजस्तै यो क्षेत्रमा पनि विकृति छ। महिलाप्रति समाजकै नियत खराब छ।'
स्वस्तिमा र लक्ष्मीले यो किताब पढ्ने क्रममा किताबमा उल्लेख कतिपय घटना र पात्रबारे आफूहरूले छलफल पनि गरेको बताए।
स्वस्तिमाले आफूले राम्रो समूहसँग काम गर्ने अवसर पाएकोले किताबमा उल्लेख भएकै स्तरको शोषण भोग्नु नपरे पनि सुरुवाती चरणमा केही प्रलोभन देखाउनेहरू भेटिएको बताइन्।
'सोसल मिडियामा विभिन्न खालका प्रस्ताव गर्नेहरु भेटिन्थे, तर म डिलिट गर्दिहाल्थेँ,' उनले थपिन्, 'कति फ्यानले फोटो खिच्ने बहानामा शारीरिक दुर्व्यवहार गर्न खोजेका छन्। त्यस्तो बेला बेलैमा सतर्क हुन्छु।'
लक्ष्मीले भने आफूले प्रत्यक्ष रुपमै दुर्व्यवहार भोगेको बताउँदै प्रतिवाद गरेकाले त्यसपछि फेरि त्यस्तो घटना नदोहोरिएको बताइन्। स्वस्तिमाको कुरामा सहमति जनाउँदै उनले सोसल मिडियामा पछ्याउनेहरूको सामना आफूले पनि गर्नुपरेको बताइन्।
नायिका रेखाले सिनेमा क्षेत्रमा मात्रै खराब नियत भएका मान्छेहरु नभई समाजको हरेक क्षेत्रमा 'डबल स्टान्डर्ड' छ भन्दै उनले महिलामाथि मात्रै नभएर पुरुषमाथि पनि शोषण हुने कुरा औंल्याइन्।
उनले भनिन्, 'लेखकले पुरुषमाथिको शोषणबारे अर्को किताब लेखेको पढ्ने रहर छ।'
रेखाको जवाफमा पत्रकार खड्काले भने, 'मलाई महिला कलाकारका पीडाले बढी छोएकोले किताबमा त्यही समेट्ने प्रयास गरेको छु।'
उनले नियतलाई रंगिन दुनियाँका रंगहिन दृष्टान्त भनेका छन्।
शुक्रबार साप्ताहिकमा पत्रकार खड्काले एउटा स्तम्भ लेखेका थिए– एक घुम्ती, एक पात्र। रंगीन ग्ल्यामर क्षेत्रका अँध्यारा र दुखद पाटाहरू उजागर गर्ने क्रममा उनले यो क्षेत्रमा आउने महिला कलाकारमाथिको शोषणका अनेक घटना सुने, देखे। आफूले देखेका सुनेका कुरामा थप खोज गर्दा देखे सुनेका कुरा उनलाई नियति नभएर नियत भएको निष्कर्ष निकाले।
उनले भने, 'त्यही भएर किताबको नाम पनि नियत राखेको हो।'
तीन नायिका सँगै नेपाल लाइभका सम्पादक नारायण अमृत र अमर खड्काले संयुक्त रुपमा सार्वजनिक गरेको नियतबारे अन्तर्क्रिया कार्यक्रमको संचालन पत्रकार दीपज्योती थापाले गरेकी थिइन्।