हाल कोरोनाभाइरस विश्वव्यापी प्रकोप बनिसकेको छ।
यसले मानिसको दैनिकीसँगै व्यापार व्यवसायलाई समेत ठूलो असर परेको छ। अर्थशास्त्रीहरूले कोरोनाभाइरसका कारण विश्वव्यापी आर्थिक वृद्धिमा असर गर्ने बताइसकेका छन्। यस्तोमा यसबाट सबैभन्दा बढी प्रभावित हुनेमा सिनेमा क्षेत्र पनि परेको छ।
संसारका विभिन्न देशले सामुहिक जमघट हुने विभिन्न कार्यक्रमलाई रोक लगाएका छन् जसमा सिनेमा घर पनि प्रमुख स्थल हो।
कोरोनाभाइरसको यसै असरलाई ध्यानमा राख्दै रिलिजको संघारमा रहेका र रिलिजको तयारीमा रहेका सिनेमाहरूले तत्कालका लागि आफ्नो रिलिज कार्यक्रमलाई थाती राखेका छन्।
यसमा कतिले नयाँ रिलिज मिति तोकेका छन् भने कतिले उपयूक्त समय तोकिने मात्र बताएका छन्।
नेपाली सिनेमामा पनि यसको असर देखिएको छ। विभिन्न सिनेमाले आफ्नो रिलिज स्थगित गरिसकेको अवस्था छ भने केही परिस्थिति हेरेर सिनेमा स्थगित गर्ने मनस्थितिमा पुगेका छन्।
यसको विशेष असर संसार ठूला सिने उद्योगहरू हलिउड र बलिउडलाई नराम्ररी परेको छ। विभिन्न सिनेमाले आफ्नो रिलिज स्थगीत गरिसकेका छन्।
यसरी रिलिज स्थगीत गर्ने हलिउड सिनेमामा जेम्स बोन्डको २५ औं फ्रान्चाइज 'नो टाइम टु डाइ', 'फास्ट एण्ड दि फ्यूरियस'को नवौं फ्रान्चाइस, निकी कैरोको 'मुलान', 'द न्यू म्युटेन्टस' तथा 'एन्टलर्स' रहेका छन्।
'नो टाइम टु डाइ'ले अप्रिल दुईको रिलिज मिति स्थगित गरेको हो भने 'फास्ट एण्ड फ्यूरियस'ले २२ मेको रिलिज मिति स्थगित गरेको हो।
जेम्स बोन्ड सिनेमाको रिलिज ८ महिना पर सरेको छ भने 'फास्ट एण्ड दि फ्यूरियस' आगामी वर्षको अप्रिलमा रिलिज हुने भएको छ।
यसैगरी बलिउडले पनि सिनेमा रिलिजसँगै सिनेमासम्बन्धी कार्यक्रमसमेत स्थगित गर्न बाध्य भएको छ।
मार्चको अन्त्यमा हुने तय भएको 'आइफा' अवार्ड तत्कालका लागि स्थगित भएको छ। यसैगरी सलमान खानको क्यानडामा तय भएको एक कार्यक्रम पनि रद्ध भएको छ।
यसै महिना रिलिज हुने अक्षयकुमार स्टारर 'सूर्यवंशी'को रिलिज स्थगित भएको छ भने अक्टुबर २ मा रिलिज हुने घोषणा भएको विक्की कौशल स्टारर 'सरदार उधुम सिंह' आगामी वर्षको १५ जनवरीमा रिलिज हुनेगरी सरेको छ।
