निर्देशक हेमराज बिसीले वेब सिरिज निर्देशन गर्ने भएका छन्।
वेब सिरिजमा 'सम्बोधन' र 'ग्याङ्स्टर ब्लुज' का निर्माता सरोज न्यौपाने तथा पोखराका युवा व्यवसायी सौगात थापाको लगानी रहनेछ।
वेब सिरिजले शहरी पारिवारिक कथा पेस गर्ने जानकारी सिरिजका निर्माता न्यौपानेले दिएका छन्।
पोखरामा छायाँकन गरिने यस वेब सिरिज ८ देखि १० भागको हुने निर्माता न्यौपानेले बताए।
करिब १ करोडको लागतमा तयार हुने सिरिजको सुटिङ मंसिरको दोश्रो साताबाट गर्ने योजनामा निर्माणपक्ष रहेको छ।
निर्माता न्यौपाने सेतोपाटीसँग कुरा गर्दै हाल स्क्रिप्ट अन्तिम चरणमा पुगेको र सिरिजलाई अमेजन प्राइम वा नेटफ्लिक्सबाट रिलिज गर्ने प्रयास भइरहेको बताए।
उनका अनुसार स्क्रिप्टको काम सकिने बित्तिकै कास्ट, क्रु र सिरिजको जानकारी सार्वजनिक गरिनेछ।
