बलिउड अभिनेता आयुष्मान खुरानाले हालै आफ्नो इन्स्टाग्राम स्टोरीमा एउटा फोटो सार्वजनिक गरे। उनले सार्वजनिक गरेकाे फोटो उनी कलेज पढ्दा बेलाको हो।
फोटोमा आयुष्मानसँगै उनकी पत्नी ताहिरा कश्यप र उनीहरूका एक जना साथी छन्। फोटोसँगै आयुष्मानले लेखेका छन्, 'सिर्का, २००३। कलेजका दिनहरू। हा, म कस्तो लल्लू थिएँ।'
आयुष्मानले उक्त फोटोको क्याप्सनमा आफूले आफैंलाई 'लल्लू' भनेका हुन्।
हिन्दुस्तान टाइम्सका अनुसार यसअघि ताहिराले पनि यही फोटो इन्स्टाग्राममा राख्दै कलेजका सुनौला दिनहरू सम्झेकी थिइन्। आयुष्मान र ताहिरा एउटै स्कुल पढेका हुन्। उनीहरूबीच निकटता भने कलेज पुगेपछि मात्र भयो, त्यो पनि पारिवारिक जमघटका कारण।
'म सानैदेखि लजालू थिएँ। ताहिरा नै एक महिला हुन् जाेसँग म नजिक भए र प्रेममा परेँ,' आयुष्मानले सन् २०१२ मा हिन्दुस्तान टाइम्सलाई दिएको अन्तर्वार्तामा भनेका छन्।
यसै सम्बन्धमा ताहिराले पनि भनेकी छन्, 'हाम्रो बिहे हुनु एक वर्षअघि मात्रै आयुष्मानले प्रेम प्रस्ताव राखेका थिए। प्रस्ताव राख्दा उनी भलादमी ढंगमा प्रस्तुत भएका थिए। पृष्ठभूमिमा संगीत बजिरहेकाे थियो। राताे गुलाब, वाइन अनि रोमान्टिक क्यान्डललाइट डिनरमा औंठी दिएर प्रेम प्रस्ताव राखेका थिए।'
सन् २०१९ मा एक अन्तर्वार्तामा बोल्दै ताहिराले आफ्नो र आयुष्मानकाे सम्बन्ध १२ वर्ष पुरानो रहेकाे बताएकी थिइन्। उनीहरूको बिहे सन् २०११ नाेभेम्बरमा भएकाे हो। अहिले उनीहरू आठ वर्षीय छोरा र छ वर्षीया छोरीका आमाबुवा बनिसकेका छन्।
आफूहरूको प्रेमबारे आयुष्मानले हिन्दुस्तान टाइम्सलाई थप भनेका थिए, 'ताहिरा मभन्दा धेरै बाठी र बुद्धिमान थिइन्। उनले सधैं मलाई सम्झाउँछिन् र उनी साँच्चै सुन्दर छिन्।'
ताहिराले पनि आयुष्मानको प्रशंसा गर्दै भनेकी थिइन्, 'आयुष्मान संवेदनशील छन्। रोमान्टिक र धेरै ख्याल गर्ने मान्छे छन्। उनी सधैं मलाई धेरै प्रेम र ध्यान दिइराख्छन्। मलाई खुसी राख्न प्रयास गरिरहन्छन्।'
आयुष्मान खुराना पछिल्लो समयका 'हिट' अभिनेता हुन्। फिल्म 'विक्की डोनर' बाट अभिनय सुरू गरेका उनले परम्परागत 'हिरो' को अवधारणा बदल्दै आफूलाई विभिन्न भूमिकामा पेश गरिसकेका छन्।
यो वर्ष उनका दुई फिल्म 'शुभ मंगल ज्यादा सावधान' र 'गुलाबो सिताबो' आए। यसअघिका उनले सातवटा फिल्म खेलेका थिए। 'बरेलीकी बर्फी', 'शुभ मंगल सावधान', 'अन्धाधुन', 'बधाइ हो', 'आर्टिकल १५', 'ड्रिम गर्ल' र 'बाला'। कम बजेटमा बनेका यी फिल्मले राम्रो प्रतिक्रियासहित कमाइमा हिट सावित भए।
फरक भूमिका र अलग कथामा देखिने आयुस्मानलाई बलिउडका 'हिट मेसिन' समेत भनिन थालिएको छ।
