'बाहुबली' फिल्म निर्देशक एसएस राजामौलीको नयाँ फिल्म 'आरआरआर' सुटिङ हुँदैछ। फिल्ममा तेलेगु सिनेमाका चर्चित अभिनेता जुनियर एनटिआर र रामचरणको मुख्य अभिनय रहनेछ।
यसमा बलिउड अभिनेता अजय देवगन र अभिनेत्री आलिया भट्टको पनि अभिनय छ। हालै बलिउड हंगामामा सार्वजनिक समाचार अनुसार अब आमिर खान पनि यो फिल्मसँग जोडिने भएका छन्।
कोरोनासँगै फिल्मको सुटिङ ७ महिना रोकिएको थियो। सुटिङ गत अक्टोबरदेखि पुनः सुरू भएको हो।
यो फिल्ममा आमिर खानको आवाज हुनेछ।
'आमिर खानले मौखिक रुपमा फिल्मको कथा वाचन गर्न सहमति जनाएका छन्,' बलिउड हंगामाले लेखेको छ, 'आमिरले फिल्मको परिदृश्य, जुनिअर एनटिआर र रामचरणको परिचय दिनेछन्। उनको स्वर ट्रेलरमा समेत समावेश गरिनेछ। यसो हुँदा हामी बलिउड दर्शकसामु पनि पुग्न सक्छौं।'
बलिउड कलाकारहरूको पनि अभिनय भएकाले 'आरआरआर' मा बलिउड दर्शक बढी हुने अनुमान लगाइएको छ।
आरआरआरमा अजय देवगन, आलिया भट्ट र आमिर खानको भूमिका भएसँगै यो 'एएए प्रोजेक्ट' भएको समेत बलिउड हंगामाले लेखेको छ। फिल्म सन् २०२१ को जनवरीमा सार्वजनिक हुँदैछ। यो हिन्दी, कन्नड, मलयालम र तमिल भाषामा सार्वजनिक हुने भएको हो।
आमिर खान विगत १० वर्षदेखि 'महाभारत' फिल्म बनाउन लागिपरेका छन्। यसका लागि उनी निर्देशक एसएस राजामौली र उनका पिता केभी विजेन्द्र प्रसादसँग स्क्रिन-प्ले निर्माणका लागि वार्ता गरिरहेका छन्। महाकाव्यलाई ठूलो पर्दा अर्थात् सिनेमामा ल्याउने आमिरको सपना हो।
एसएस राजामौलीको 'आरआरआर' मा आमिरको वाचन, अजय र आलियाको प्रस्तुतिले बलिउड र दक्षिण भारतीय सिनेमाको सहकार्य देखाउँछ। आमिरको महाभारतलाई ठूलो पर्दामा ल्याउने चरणमा यो पहिलो पाइला हुन सक्ने अनुमान छ।
