विश्वकै चर्चित कोरियन म्युजिक ब्यान्ड 'बिटिएस' पहिलो पटक 'ग्रामी अवार्ड' मा मनोनित भएको छ। 'बिटिएस' को हालै हिट भएको गीत ‘डायनामाइट’ ग्रामी अवार्डको सर्वश्रेष्ठ पप डुओ तथा ग्रुप पफर्मेन्स विधामा मनोनित भएको हो।
द गार्डियनका अनुसार, मंगलबार भएको अनलाइन समारोहमार्फत् अमेरिकी म्युजिक अवार्डले कोरियन ब्यान्ड ग्रामीमा मनोनित भएको घोषणा गरेको थियो। जसमा अन्य चर्चित गायक जस्टिन बिबर, अरियाना ग्रान्डे, लेडी गागा, टेलर स्विफ्ट पनि मनोनयनमा परेका छन्।
यतिबेला बिटिएस ब्यान्डका चार सदस्यले ग्रामीमा मनोनित भएको खबर सुन्ने बित्तिकै खुसीले ताली बजाएर उफ्रिएको भिडियो सामाजिक सञ्जालमा भाइरल भइरहेको छ।
सातजना सदस्य भएको यस ब्यान्डले ‘आर्मी’ नामबाट चिनिने आफ्ना विश्वभरका फ्यानहरुलाई ग्रामी मनोनयनमा पर्न सहयोग गरेकोमा धन्यवाद दिएका छन्।
‘हाम्रो गीत सुनिदिने र कठिन समयमा पनि साथ दिइरहने सबैलाई धन्यवाद,’ ब्यान्डले ट्वीटरमा लेखेको छ, ‘विशेष गरी आर्मीले हामीलाई ग्रामीसम्म पुग्ने कलाकार बनाउनु भयो। हामी यसका लागि सधैँ धन्य हुनेछौँ र तपाईंहरुलाई माया गरिरहने छौँ।’
ब्यान्डले ग्रामी अवार्ड दिने रेकर्डिङ एकेडेमीलाई पनि धन्यवाद भनेको छ।
मनोनयनपछि बिटिएसका विश्वभरका हजारौँ फ्यानले सामाजिक सञ्जालमा बधाइ दिइरहेका छन्।
बिटिएसका सात सदस्य गत वर्षको ग्रामी अवार्डमा प्रस्तुतकर्ताका रुपमा देखिएका थिए। उनीहरुले त्यही बेला एउटा अन्तर्वार्तामा सो अवार्ड जित्ने इच्छा व्यक्त गरेका थिए।
२०१३ मा संगीत ब्यान्डको रुपमा डेब्यू गरेको बिटिएस अहिले के-पप क्षेत्रमा पहिलो स्थानमा छ।
उनीहरुको ‘डाइनामाइट’ गीत बिलबोर्डको 'हट १००' को शीर्ष स्थानमा डेब्यू गर्ने पहिलो दक्षिण कोरियाली गीत पनि बनिसकेको छ।
कोरियाली अखबार योन्हापअनुसार, ग्रामी जित्न सफल भएमा बिटिएस ग्रामी, बिलबोर्ड र अमेरिकन म्युजिक अवार्ड जित्ने पहिलो दक्षिण कोरियाली ब्यान्ड हुनेछ।