लेखक खगेन्द्र संग्रौलाको ‘कोरोना कैरन’ र आहुतिको ‘जात वार्ता’ पुस्तक प्रकाशित भएका छन्। यी दुई गैरआख्यानसँगै नयाँ प्रकाशन संस्था बेला पब्लिकेसन्सले आफ्नो प्रकाशन यात्रा सुरु गरेको छ।
‘कोरोना कैरन’मा संग्रौलाका २७ औटा नयाँ निबन्ध समावेश छन्। किताबले कोरोना भाइरसका कारण उत्पन्न महामारी र त्यसले सिर्जना गरेको सामाजिक–आर्थिक संकट र बेथितिका विषय छोएको छ।
‘भोकले मर्ने सप्तरीका मलर सदादेखि आफूलाई कोरोना भाइरस सल्केपछि अरुका ज्यान बचाउने पवित्र ध्येयले आफ्नो ज्यान लिने इटालीकी नर्स ड्यानिएला ट्रेज्जीसम्मलाई यो कैरनमालाले समेटेको छ,' बेला पब्लिकेसन्सका सम्पादक विनोदविक्रम केसीले भने, 'खासमा यो पुस्तक दुखियाहरुको खबरमाला हो।’
लामो समयदेखि नेपाली समाजको वर्गचरित्रबारे चिन्तन गर्दै आएका लेखक तथा राजनीतिज्ञ आहुतिको नयाँ पुस्तक ‘जात वार्ता’ दक्षिण एसियामा विद्यमान जात व्यवस्था, त्यसले उत्पादन गरेका समस्या र त्यसको उन्मुलनबारे केन्द्रित छ।
‘जात वार्ता’ पुस्तक पनि प्रस्तावनासहित २७ अध्यायमा विभाजित छ। पुस्तकले जात व्यवस्थाको उत्पत्ति, विकास, धर्मपरिवर्तन, अन्तरजातीय प्रेम र विवाह, दलित आन्दोलनमा गैरसरकारी संस्थाको भूमिका, अन्तरदलित भेदभावलगायत सामाजिक जीवनमा बारम्बार उठिरहने प्रश्नको जवाफ खोज्ने काम गरेको छ। लेखक आहुतिले यसलाई ‘निरन्तर संघर्षका निम्ति हाते पुस्तक’ भनेका छन्।
बेला पब्लिकेसन्सकी 'चिफ प्रोडक्सन अफिसर' वन्दना ढकालले भनिन्, 'कोरोना महामारी र जात व्यवस्था आजको नेपाली समाजलाई प्रभाव पारिरहेका सबैभन्दा ज्वलन्त विषय भएकाले यिनै विषयमा आधारित गैरआख्यान पुस्तकबाट हामीले प्रकाशन प्रारम्भ गरेका हौं।'
परीक्षण प्रकाशनका रुपमा यी दुई पुस्तक बजारमा ल्याएको बेला पब्लिकेसन्सले अंग्रेजी नयाँ वर्षसँगै नियमित प्रकाशन योजना र वार्षिक प्रकाशन क्यालेन्डर सार्वजनिक गर्ने उनले बताइन्।