काठमाडौं अन्तर्राष्ट्रिय पर्वतीय चलचित्र महोत्सव (किम्फ) को १८ औं संस्करण डिसेम्बर १० देखि १४ सम्म आयोजना हुने भएको छ। कोरोना संक्रमण फैलने जोखिमका कारण यस पटकको महोत्सव भने ‘भर्चुअल’ हुने आयोजकद्वारा बुधबार जारी विज्ञप्तिमा जनाइएको छ।
यस पटक महोत्सवमा १५ देशका १८ ओटा चलचित्र प्रदर्शनका लागि छानिएका छन्। त्यसबाहेक ‘नेपाल पानोरामा’ अन्तर्गत कथानक र डकुमेन्ट्री गरी १२ वटा चलचित्र देखाइनेछन्। महोत्सवका क्रममा सिनेकर्मी र वक्ताहरूसित ‘भर्चुअल’ अन्तरक्रिया र संवाद कार्यक्रम पनि सञ्चालन गरिने विज्ञप्तिमा उल्लेख छ।
महोत्सवमा प्रदर्शन गरिने फिल्महरू भिमिओमा www.kimff.org मा मार्फत हेर्न सकिनेछ।
यस पटक समावेश अन्तर्राष्ट्रिय चलचित्रहरूमा पर्वतीय जनजीवन, संस्कृति, वातावरण र पर्वतारोहण तथा साहसिक गतिविधि समेटिएका छन्। नेपाल पानोरामामा फेरि एक पटक प्रतिभाशाली युवा नेपाली सिनेकर्मीहरूको प्रस्तुति देख्न पाइनेछ।
यस पटक किम्फको सन्देश ‘तमसोमा ज्योतिर्गमय’ र अंग्रेजीमा (अगेन्स्ट डिसअपिअर टुवार्ड्स होप) रहेको छ। अहिले कोरोनाको महाव्याधिले उत्पन्न गरेको संकटसित जुध्दै आशा र विश्वासका साथ अघि बढ्ने ध्येय यस नारामा प्रतिबिम्बित भएको छ।
किम्फ २०२० को उद्घाटन विख्यात भुटानी फिल्म निर्देशक खेन्चे नोर्बु रिम्पोचेको नयाँ चलचित्र ‘लुकिङ फर अ लेडी विथ फ्याङ्गस एन्ड अ मुस्ट्याच’ को प्रदर्शनबाट हुनेछ। यस चलचित्रको पूरै छायांकन नेपालमै भएको थियो। उक्त अवसरमा रिम्पोचेले भर्चुअल प्रवचन पनि दिनेछन्।
डकुमेन्ट्री र फिक्सन फिल्मबारे नेपाली युवा फिल्ममेकरहरू माझ छुट्टाछुट्टै संवाद पनि महोत्सवको कार्यक्रममा समावेश गरिएको छ।
दिवंगत लेखक पिटर जे कार्थकको हिमाल किताबद्वारा प्रकाशित ‘नेपाली म्युजिक मेकर्स’ नामक पुस्तकको नेपाली अनुवादको विमोचन पनि महोत्सवको अवसरमा गरिनेछ।
यसैगरी कोभिड-१९ र लकडाउनबारे बनाइएका विशेष डकुमेन्ट्रीहरूको प्रदर्शनपछि ती फिल्मका वास्तविक पात्र तथा कोभिड विशेषज्ञहरू माझ छलफल र विमर्श गरिने समेत विज्ञप्तिमा जनाइएको छ।
यस पटकको तीन सदस्यीय निर्णायक मण्डलमा अमेरिकी डकुमेन्ट्री फिल्ममेकर जुली ब्रिजह्याम, स्वीस पत्रकार र फिल्ममेकर लिजा रुस्ली र नेपालका लेखक नयनराज पाण्डे छन्। निर्णायक मण्डलले अन्तर्राष्ट्रिय खण्डतर्फ उत्कृष्ट तीनवटा चलचित्र तथा नेपाल पानोरामा खण्डतर्फ उत्कृष्ट कथानक (फिक्सन) र उत्कृष्ट डकुमेन्ट्री चलचित्रको छनौट गर्नेछ।
अन्तर्राष्ट्रिय खण्डमा १५ देशका १८ वटा चलचित्र र नेपाल पानोरामातर्फ १२ वटा चलचित्रबीच प्रतिस्पर्धा हुनेछ।अन्तर्राष्ट्रिय खण्डतर्फ पहिलो, दोस्रो र तेस्रो हुने चलचित्रले क्रमश: दुई लाख, एक लाख ५० हजार र १ लाख नगद नेपाली रुपैयाँ पुरस्कार प्राप्त गर्नेछन्।
उक्त पुरस्कार राशि क्रमश: नेपाल पर्वतारोहण संघ, हिमालयन इन्टरन्यासनल माउन्टेन फिल्म अफ चाइना (एचआइएमएफ) र स्वीट्जरल्यान्डका व्यवसायी उर्सुला तथा फ्रेडी ओहल्यान्डद्वारा उपलब्ध गराइएको हो। उत्कृष्ट ठहरिने नेपाली कथानक चलचित्र र उत्कृष्ट डकुमेन्ट्रीको पुरस्कार राशि क्रमश: १ लाख र ७५ हजार नेपाली रुपैयाँ रहेको छ। पुरस्कार रकम क्रमश: मिला प्रोडक्सन्स तथा चलचित्र विकास बोर्डले उपलब्ध गराएको हो।
किम्फ इन्टरन्यासनल अलायन्स फर माउन्टेन फिल्म नामक विश्व संस्थाको सक्रिय सदस्य रहेको छ। यस संस्थामा २० ओटा मुलुकका २८ वटा माउन्टेन फिल्म फेस्टिभलहरू सदस्य रहेका छन्। यस वर्ष धेरै मुलुकका माउन्टेन फिल्म फेस्टिभलहरूले कोभिड-१९ का कारण भर्चुअल फेस्टिभलहरू गरिरहेका छन्।
महोत्सवमा देखाइने चलचित्रहरूले यसअघि झैं दर्शकहरूलाई मनोरञ्जन प्रदान गर्नुका साथै समसामयिक विषयतर्फ दर्शकहरूको ध्यान आकर्षित गर्नेछन्। ती विषयमा महोत्सवले सार्वजनिक संवाद र विमर्शको उठान गर्न सघाउनेछन् भन्ने आशा किम्फ आयोजक समितिले राखेको महोत्सव निर्देशक रम्यता लिम्बूद्वारा जारी विज्ञप्तिमा उल्लेख छ।