नेपाल अन्तर्राष्ट्रिय चलचित्र महोत्सव (निफ) २०२१ मा यो वर्ष तीन वटा नेपाली सिनेमाबीच प्रतिस्पर्धा हुने भएको छ। आयोजक नेपाल चलचित्र तथा सांस्कृतिक प्रतिष्ठानका अध्यक्ष केपी पाठकले महोत्सवमा ‘आमा खान्डो’, ‘लाटोकोसेरो’, ‘सरिता ११ वर्ष’ प्रतिस्पर्धाका लागि छानिएको छ।
२०७८ बैसाख २३ देखि २७ सम्म काठमाडौंमा आयोजना हुने महोत्सवमा विभिन्न ५२ देशबाट ४ सय ५० फिल्म प्राप्त भएको थियो। आन्तरिक छनौट समितिले दिएको नम्बरको आधारमा उच्च नम्बर पाउने मध्येबाट ३१ देशका ६३ सिनेमालाई महोत्सवमा प्रस्तिस्पर्धाको लागि पहिले नै छनोट गरिएको थियो भने नेपाली प्रतिस्पर्धा अन्तर्गत फिचर फिल्म छनोट हुन बाँकी थियो।
फिचर फिल्म विधामा तीन फिल्म थपिएपछि अब निफमा ६६ फिल्म देखाइने भएको छ। प्रतिस्पर्धी तीन फिल्ममध्ये उत्कृष्टले नेपाली फिचर फिल्म प्रतिस्पर्धाअन्तर्गत एक लाख नगद पुरस्कारसहित ट्रफी, उत्कृष्ट निर्देशक, लेखक, छायाकार,अभिनेता र अभिनेत्री ट्रफी पाउने छन्।
‘विश्वका कथाहरुको उत्सव’ नाराका साथ ‘फिल्म संस्कृति’को विकास गर्ने उद्देश्य सहित सुरु भएको फेस्टिभलमा यो वर्ष महामारीको विषयमा बनेका फिल्मलाई बेग्लै विधामा प्रतिस्पर्धा गराई अवार्ड पनि वितरण गरिने बताइएको छ।
कोभिड–१९ ले पारेको प्रभावमा बनेका यस्ता फिल्मले ५ सय अमेरिकी डलर तथा ट्रफी प्राप्त गर्नेछन्। अन्तर्राष्ट्रिय प्रतिष्पर्धा अन्तर्गत सर्वोत्कृष्ट फिचर फिल्मलाई १५ सय अमेरिकी डलर राशिसहित गौतम बुद्ध अवार्ड प्रदान गरिने छ।
महोत्सवमा सर्वोत्कृष्ट वृत्तचित्रलाई १ हजार डलर राशीको माउन्ट एभरेस्ट अवार्ड, सर्वोत्कृष्ट एनिमेटेड फिल्मलाई ७५० डलरको मञ्जुश्री अवार्ड, सर्वोत्कृष्ट सर्ट फिल्मलाई ५ सय डलर राशीको वागमती अवार्ड यथावत रुपमा प्रदान गरिने जानकारी दिइएको छ।
