अमेरिकाको इन्टरनेसनल फिल्म फेस्टिभल 'विन्टर फिल्म अवार्ड' मा दुई वटा पुरस्कार जितेको 'कठपुतली' को ट्रेलर सार्वजनिक भएको छ। बुधवार राजधानीमा कार्यक्रम आयोजना गरी ट्रेलर सार्वजनिक गरिएको हो।
ट्रेलरमा राजाहरुको शासनमा दरबारभित्र हुने घट्नाक्रमका दृश्य देखाइएको छ। आगामी पुष १६ गतेबाट प्रदर्शन हुने यो फिल्म भीमसेन लामाले निर्देशन गरेका हुन्।
कठपुतलीमा गौरी मल्ल, मिथिला शर्मा, कर्मा, शिल्पा माष्के, उषा रजक, सुवर्ण थापा, ध्रुव कोइरालालगायत कलाकारको अभिनय छ।
पृथ्वी राना मगर निर्माता रहेको यो फिल्म अष्ट्रेलियाका सिनेमाटोग्राफर जोएल फ्रुमले छायांकन गरेका छन्। निर्देशक लामा लण्डन र निर्माता मगर हङकङमा भएकाले फिल्मको ट्रेलर सार्वजनिक कार्यक्रममा अनुपस्थित थिए।
फिल्मका कलाकारदेखि लेखिका सम्पदा मल्लसम्मले ट्रेलर रिलिज कार्यक्रममा मास्क लगाएर प्रवेश गरेका थिए। फिल्मकी कार्यकारी निर्माता समेत रहेकी मल्लले हरर विधाको भए पनि फिल्म मौलिक कथामा बनेको बताइन्। उनले भनिन्, ‘हरर जनरामा हाम्रो पहिलो प्रयास हो। फिल्म हरर भए पनि यसले हाम्रै माटोको कथा भन्छ।’
फिल्मले भूतप्रेत, तन्त्रमन्त्रको कथा भन्नेछ ।
कलाकार मिथिला शर्माले फिल्ममा काम गर्न कथावस्तु र चरित्रले आफूलाई आकर्षित गरेको बताइन्। फिल्मले महिलालाई सशक्त रुपमा प्रस्तुत गरेको उनको भनाइ छ। उनी कठपुतलीलाई महिलाहरुको कथा भन्न पनि रुचाउँछिन्। नायक कर्माले हरर विधाको यो फिल्मले एउटा इट्टा थप्ने विश्वास व्यक्त गरे। फिल्मको कथा बलियो भएकाले नै आफू आबद्ध भएको उनले बताए।
लामो समयपछि सिनेमामा फर्किएकी उषा रजकले पहिलो पटक हरर फिल्ममा काम गर्न पाएकोमा खुसी व्यक्त गरिन्। उनले अहिलेसम्म हरर फिल्म समेत नहेरेको बताउँदै आफूलाई भूतप्रेतप्रति विश्वास रहेको बताइन् ।
कठपुतलीको सह-निर्मातामा विशाल गुरुङ, धर्म श्रेष्ठ र हेम थापा छन्। ओटीटी प्लेटफर्म ‘सिनेमा घर’ एपका सञ्चालक सागर खरेल फिल्ममा बजार व्यवस्थापकको रुपमा जोडिएका छन्।
केही दिनमा फिल्मको दोस्रो ट्रेलर पनि सार्वजनिक गर्ने बताइएको छ।
