सुर्वण थापा निर्देशित फिल्म 'म' को प्रदर्शन मिति तय गरिएको छ।
बुधबार निर्देशक थापाले सामाजिक सञ्जालमार्फत फिल्मको एक पोस्टर सार्वजनिक गर्दै फिल्मकाे प्रदर्शन मिति तय गरेका हुन्। याे फिल्म साउन २० गतेदेखि प्रदर्शन हुने भएकाे छ।
'म' कन्तिपुर फिल्म एकेडेमीले पहिलोपटक निर्माण गरेको फिल्म हो।
फिल्ममा आफ्नो अस्तित्वको खोजीमा रहेका पात्रहरूको कथा देखाइने छ। फिल्ममा निराजन प्रधान, रुविना थापा, सरोज खनाल, सरिता लामिछाने, निशा अधिकारी, सविन श्रेष्ठ, नरेन खड्का, संजोग रसाइली र पुनम श्रेष्ठलगायत कलाकारहरूको अभिनय छ। फिल्मको कथा प्रकाश पुरीले तयार पारेका हुन्।
तेन्जिन पाल्देनले छायांकन गरेको फिल्मलाई बनिस शाहले सम्पादन गरेका छन्। विमला हुमागाईं निर्माता रहेको फिल्ममा पदम पुरी सह-निर्माता रहेका छन्। यो फिल्मलाई फिल्म वितरक कम्पनीहरू डिसिएन र एफडीले वितरण गर्दैछन्।
