अभिनेत्री पूजा शर्मा र अभिनेता आकाश श्रेष्ठ अभिनित फिल्म ‘सम्झना बिर्सना’को गीत सार्वजनिक भएको छ।
शनिबार काठमाडौंमा एक कार्यक्रम गर्दै 'हाँस्ने खेल्ने बेलैमा' बोलको गीत सार्वजनिक गरिएको हो। अन्जु पन्त र किरण गजमेरको स्वर रहेको गीतमा शब्द तथा संगीत अर्जुन पोखरेलको छ। रामजी लामिछानेको कोरियोग्राफीमा पूजा र आकाशले नृत्य प्रस्तुत गरेका छन्।
निमेश प्रधानको निर्देशन रहेको फिल्ममा पूजा र आकाशसँगै छुल्ठिम गुरुङ, सुनिल थापा, शिशिर रानालगायतका कलाकारको अभिनय रहेको छ। फिल्मको कथा तथा पटकथा निर्देशक प्रधानले नै तयार पारेका हुन्।
दार्जिलिङ, सिक्किम र नेपालको जीवनको प्रेमकथामा आधारित भएर निर्माण भएको फिल्ममा अदुत्य प्रधान र रेबेका प्रधानको लगानी छ।
शिव ढकालले छायांकन गरेको फिल्मलाई तारा थापाले सम्पादन गरेका छन्। यो फिल्म असार ३१ गतेदेखि प्रदर्शन हुनेछ।
पूजा र आकाशले ‘रामकहानी’ र ‘पोइ पर्यो काले’मा एकसाथ काम गरेका थिए। उनीहरू दुवैले अभिनय गरेको फिल्म ‘सम्हालिन्छ कहिले मन’ प्रदर्शनको पखाईमा छ।
