जारी आईपिएलमा लगातार पाँचौ हार बेहोरेपछि विराट कोहलीको कप्तानीमा रहेको रोयल च्यालेन्जर्स बेङ्लोर लिग उपाधिको सपना परपर झन पर भइरहेको छ। शुक्रबार पनि विशाल योगफलका बाबजुत टोली कोलकातासँग पराजित भयो।
लगातारको पराजयपछि बलिउडबाट पनि उनको कप्तानीलाई लिएर प्रश्न उठन थालेको छ। विराटलाई विभिन्न समय आफ्ना ट्वीटका कारण विवाद र चर्चामा आइरहने अभिनेता तथा निर्माता कमाल आर खानले उनको कप्तानीमाथि प्रश्न उठाउँदै व्यङ्ग्य कसेका छन्।
उनले ट्विटबाट कोहलीलाई व्यङ्ग्य गरेका हुन्।
‘विराट कोहली आईसिसी विश्वकपमा महान कप्तान सावित हुनेछन। उनी त्यति नै महान हुनेछन् जति १० वर्षयता आरसिबीका लागि खेलेर भइरहेका छन्’, खानले ट्विटमा लेखेका छन्।
उनको यो ट्विटलाई सामाजिक संजालमा गतिलो प्रतिक्रियाहरू मिलिरहेको छ।
कोलकातासँग बेङ्लोर आन्द्रे रसेलले विस्फोटक ब्याटिङ् गरेपछि हारेको थियो। बुधबार अन्तिम समयमा रसेलले १३ बलमा ४८ रन जोडेपछि कोलकाता विजयी भएको थियो।