हाम्रो गाउँ गुल्मी धरम्पानी मैनडाँडा, रून्जाकोट र मान्कोटको खर्याहासँग जोडिएको छ। यो गाउँमा बिबिधताभित्र एकता छ। दलित, गैरदलित सबै मिलेर बसेको यो गाउँभित्र कहिल्यै कुनै दिन ठुला समस्या आएको मैले सुनेको छैन।
हाम्रो घर भन्दा तलतिर ज्वाँगे टोल छ। ज्वाँगे बुढा बा र उनका छोरा साइँला जो मस्त रक्सी पिउथे। अनि रिस उठेको कोही छ भने धित मरुन्जेल गाली गर्ने गर्थे।
भोली पल्ट जसलाई गाली गरेको उनकै घरमा गएर माफि माग्दै भन्थ्ये 'हिँजो मैले रक्सी खाएका बेला तपाईंलाई बेस्सरी गाली गरेँ रे! मलाई माफ गरिदिनुपर्यो।' अनि गाली खानेले जवाफ फर्काउथ्ये 'गर्ने बेलामा चिच्याई चिच्याई गाली गरिस अहिले माफी माग्छस।' बाबुछोरा खुट्टा समाएर ढोग्थे र भन्थे 'गाई खानी, मैले जानी जानी गाली गरेकै होइन। रक्सी खाएका बेलामा एकाउन्न बाउन्न, मैले केही थाहा पाउन्न।'
'भैगो नी त।'
जसले गाली खाए उनीहरुले माफी दिन्थ्ये। फेरी त्यही बाटो माथि भट्टीतिर गएर दुई घण्टा पछि रक्सी खाएर फर्किँदा फेरी गाली दोहोर्याउँथे। फेरी गाली सुन्नेले यिनिहरुलाइ 'एकाउन्न बाउन्न, रक्सी खा बेला मैले केही थाहा हुन्न।' भन्थ्ये सुनेको नसुनेझै गर्थ्ये। सबैले पचाउंथे।
ज्वाँगे साईला त अझ रमाइला। रक्सी खाए। गाली गर्दै आए। जसलाई गाली गर्दैछन उसँग भेट हुना साथ 'अर्कोलाई गाली गर्या हो मैले तपाईंलाई होइन है' भन्न भ्याउँथे। कति रमाइलो।
म यहि प्रशंगलाइ नाकावन्दी, ओली र भारततिर जोडन चाहन्छु।
नाकाबन्दीका बेला मोदी र भारतलाई गर्नु सम्म गाली गरेर प्रखर राष्ट्रबादी भए प्रधानमन्त्री केपी ओली। चुनाव अघि सम्म भारतलाई सबक सिकाउने बताउँदै थिए उनी। सोझा इमान्दार नेपालीले केपी ओली जस्तो अडान भएको नेता भन्दै तारिफ मात्र गरेनन। चुनाबमा अच्छा तरिकाले भोट पनि हाले। र स्पष्ट बहुमतले जिताए।
उनकै उखान टुक्कामा ताली बजाए, हाँसे, नाचे। र चुनाबमा जिताए पनि। चुनाव जिते पछि केपी ओलीको ताल हाम्रो गाउँका तिनै ज्वाँगे बुढा बा, साइँला दाई जस्तै देखियो।
'एकाउन्न बाउन्न, रक्सी खा बेला मैले केही थाहा पाउन्न' को सट्टा केपी ओली ले अलिकती फेरेर भन्न थाले 'एकाउन्न बाउन्न, मैले के बोलेँ थाहा पाउन्न'।
चुनाव जित्नासाथ प्रधानमन्त्री नबन्दै शुष्मा स्वराजलाई काठमाडौं बोलाएर केपी ओलीले के के बिन्ती चढाए हामीले देख्यौ। त्यस पछि उनी आफै भारतको राजकिय भ्रमणमा प्रस्थान गरे। ओली भारत पुगेर कसरी शरणमा परे त्यो पनि कसैबाट छिपेको छैन।
अहिले एक महिना नबित्दै ओलीले 'मोदीमय नेपाल' बनाउदै मोदीको चरम चाकडीले दुनिया हँसाउनेतिर लागेका छन। जनकपुर देखी मुस्ताङ हुँदै काठमाडौं सम्म ओलीले जुन चाकडीको ढोल बजाउँदै छन यसले के इंगीत गर्छ भने 'भारतले लिन बाँकी धेरै कुरा केपी ओली मार्फत लिन चाहन्छ।'
एमालेका प्राय सबै केन्द्रिय नेता र कार्यकर्तालाई सोधे थाहाँ हुन्छ केपी को हुन भनेर। सबैले भन्ने छन 'एमाले भित्र जमाना देखीका प्रखर भारतबादी नेता हुन ओली।' भारतको नजरमा एमाले भित्र धेरै भारतबादी भए पनि केपी ओली भन्दा निकट मितज्यू अर्को कोही छैन भारतको। त्यो कुरा सत्य हो भन्ने प्रमाण हो २०५० सालको महाकाली सन्धी।
यदी हामी कसैले 'महाकाली' बिर्सिसकेका छौ भने घनश्याम भुसाल, योगेश भट्टराई, रबिन्द्र अधिकारी, हरि रोक्का हुँदै बामदेब गौतमलाई एकचोटी सौधौ सबैकुरा पानी जस्तै छर्लगं हुने छन। ओली र भारतलाई कसैले छुट्याएर हेर्न खोज्छ भने त्यो दृष्टि दोष मात्र हो। ओली र भारतको सम्वन्ध यति फिका र कमजोर छैन।
यथार्थमा केपी ओली उखान टुक्का मास्टर हुन।
बोल्ने हँसाउने कुरामा उनलाई उछिन्ने अरु कोही छैनन। म त उनको उखान टुक्का र भाषण शैलीको फ्यान हुँ। उनको जति तारिफ गरे पनि कम हुन्छ। आजकल म हाँस्य ब्यँग्य कार्यक्रम र मेरा थुप्रै कलाकार साथीहरुको अभिनय होइन केपी ओलीको भाषण हेर्छु। उनी वास्तविक कलाकार हुन। जोक्कर हुन। यिनका अँगाडी कुनै जोक्कर टिक्न सक्ला जस्तो मलाई लाग्दैन।
मह जोडीलाई केपी ओलीले धेरै पछाडि पारिसकेका छन। धुर्मुस र सुन्तली हँसाउन छोडेर सामाजिक काममा किन लागे भन्या बल्ल बुझिंदैछ। आफ्नो अस्तित्व जोगाए हाँस्य क्षेत्र छोडेर धुर्मुस र सुन्तलीले, राम्रो गरे।
अब कुन दिन देखी शिवहरी पौडेल, किरण केसी, दीपक दीपा, जितु, माग्ने बुढा देखी, निरज, बल्छी, जिग्री सिग्री सबै केपीका अंगाडी लम्पसार परेर सकिएन प्रभु तपाईं सँग भन्ने हुन थाहा छैन।
लेखेरै राख्नुस - यिनको उखान टुक्का र हाँस्यब्यङ्ग बाहेक मुलुकले केही पाउने छैन बरु बँचे खुचेको भारतलाई बुझाएर हिडने छन।
अहिले मोदीमय नेपाल हेर्दा त्यही देखिंदैन र?
केपी ओलीले भनेझैँ चुला चुला ग्यास पनि पुग्न सक्छ, हावाबाट बिजुली निस्किन पनि सक्छ, पूर्व पश्चिम रेल, सुरुङ्ग मार्ग चल्न पनि सक्छ तर 'कौडी न सौडी बजार बजार दौडी' गरेर ति सबै कुरा कसरी सम्भब छ अहिले?
केपी ले आफ्नै अर्थमन्त्रीको स्वेत पत्र पढे की पढेनन होला? पढेको भए यस्ता हावादारी कुरा नगर्नुपर्ने हो। सिङ्गो राज्यले एउटा खेलकुद मैदान बनाउन सक्दैन। धुर्मुस र सुन्तलीले बस्ती बसाउने देखी खेलकुद मैदान सम्म बनाइदिनुपर्ने देशको राजनितीमा मैले केपी ओलीको भुमिका ज्वाँगे बुढा बा र उनका छोरा साइँलाको भन्दा फरक पाइन।