आज (मंगलबार) बाट दोस्रो संस्करणको 'नाइमा मोबिलिटी एक्स्पो २०२६' काठमाडौंको भृकुटीमण्डपमा सुरू भएको छ।
नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा) को आयोजनामा आजदेखि सुरू भएको एक्स्पो ६ दिनसम्म चल्नेछ।
यातायात बिक्रेताहरूले यो एक्स्पोलाई 'अटोमोबाइल क्षेत्रको कुम्भ मेला' का रूपमा लिएका छन्। एक्स्पोमा ठूलो संख्यामा सवारीसाधनका ब्रान्ड, नयाँ मोडल, प्रविधि र मोबिलिटीसँग सम्बन्धित उत्पादन तथा सेवा एकै ठाउँमा प्रदर्शन गरिएको छ।
यसपटकको एक्स्पोमा ५५ भन्दा बढी ब्रान्ड सहभागी भएका छन्। ४० भन्दा बढी नयाँ मोडल तथा उत्पादन सार्वजनिक गर्ने तयारी गरिएको छ। मेलामा ५१ वटा स्टल छन्।
चारपांग्रे, दुईपांग्रे र व्यावसायिक सवारीसाधनका विभिन्न उत्पादन एक्स्पोका मुख्य आकर्षण छन्। विभिन्न ब्रान्डका नयाँ विद्युतीय कार, ई–स्कुटर तथा विद्युतीय व्यावसायिक सवारीसाधन प्रदर्शनमा राखिएका छन्।
नेपालमा भित्रिएका नयाँ सवारीसाधन र आधुनिक प्रविधिलाई पनि एक्स्पोमा सार्वजनिक गरिएको छ। यसले एक्स्पोलाई नयाँ सवारीसाधन हेर्ने थलोका रूपमा मात्र सीमित नरहेको आयोजकले जानएको छ।
बैंक तथा वित्तीय संस्था र बीमा कम्पनीको सहभागिता पनि एक्स्पोमा छ। सवारीसाधन खरिदका लागि विशेष अफर र सहुलियत कर्जाका योजना ल्याइएका छन्।
अटो पार्टपुर्जा, ब्याट्री, चार्जिङ स्टेसन र विभिन्न एक्सेसरिजका स्टल पनि छन्। यसले सवारीसाधनसँग जोडिएको समग्र इकोसिस्टमलाई एक्स्पोमा समेटेको छ।
नाइमा नेपालका अनुसार एक्स्पोको उद्देश्य नेपालमा दिगो, हरित र प्रविधिमैत्री यातायात प्रणालीलाई प्रवर्द्धन गर्नु हो। स्वदेशी तथा बहुराष्ट्रिय सवारीसाधन निर्माता र आयातकर्ताको सहभागिता छ।
एक्स्पोमा सवारीसाधनको प्रदर्शनीसँगै मोबिलिटी क्षेत्रका विभिन्न विषयमा बहस र छलफल पनि हुनेछन्। सडक दुर्घटना र त्यसका असरबारे छलफल हुनेछ। दुर्घटनापछिको तत्कालको हेरचाहबारे पनि अन्तर्क्रिया हुने बताइएको छ।
यातायात क्षेत्रमा भइरहेको लगानी, युवा सशक्तीकरण, ब्याट्री रिसाइकल, कृत्रिम बौद्धिकता (एआई), प्रविधि तथा सीप र क्षमता अभिवृद्धिका विषयमा पनि वृहत् छलफल हुने आयोजकले जनाएको छ।
नाइमा अध्यक्ष रितु सिंह वैद्यले एक्स्पोलाई सवारीसाधन प्रदर्शन गर्ने कार्यक्रममा मात्र सीमित नराखी आधुनिक, दिगो र पहुँचयोग्य मोबिलिटी प्रवर्द्धन गर्ने साझा प्लेटफर्मका रूपमा विकास गर्ने उद्देश्य रहेको बताएकी छन्।
यो एक्स्पोलाई केवल प्रदर्शनीका रूपमा होइन, नेपालमा आधुनिक, दिगो र पहुँचयोग्य मोबिलिटी प्रवर्द्धन गर्ने साझा प्लेटफर्मका रूपमा विकास गर्ने वैद्यले बताइन्।
पछिल्लो समय नेपालको मोबिलिटी बजार परम्परागत इन्जिनबाट विद्युतीय तथा अन्य वैकल्पिक प्रविधितर्फ अघि बढिरहेको छ। यही परिवर्तनलाई एक्स्पोमा रहेका नयाँ मोडल, प्रविधि र छलफलले पनि प्रतिबिम्बित गरेको छ।
दोस्रो नाइमा मोबिलिटी एक्स्पो नयाँ कार, बाइक वा विद्युतीय सवारीसाधन हेर्ने ठाउँ मात्र नभई नेपालको मोबिलिटी क्षेत्र अब कुन दिशातर्फ अघि बढिरहेको छ भन्ने बुझ्ने अवसरका रूपमा पनि हेरिएको उनको भनाइ छ।
