नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा) की अध्यक्ष रितु सिंह वैद्यले अटोमोबाइल क्षेत्रमा हठात् र बारम्बार परिवर्तन हुने नीतिले बजारमा अन्योल र अस्थिरता सिर्जना गर्ने बताएकी छन्।
मंगलबार काठमाडौंमा सुरू भएको दोस्रो नाइमा मोबिलिटी एक्स्पोको उद्घाटन सत्रमा बोल्दै अध्यक्ष वैद्यले अटोमोबाइल क्षेत्रमा लगानी सुरक्षित गर्न स्थिर, पूर्वानुमानयोग्य र परामर्शमा आधारित नीति आवश्यक रहेको बताइन्।
नीतिगत स्थिरता नहुँदा व्यवसायीले दीर्घकालीन लगानीको योजना बनाउन कठिन हुने उनको भनाइ छ।
उनले मोबिलिटीलाई विलासिता वा राजस्व संकलनको माध्यमका रूपमा मात्र हेर्न नहुने बताइन्।
मोबिलिटी शिक्षा, स्वास्थ्य र रोजगारीसँग जोडिएको आधारभूत आवश्यकता भएको उनको भनाइ छ।
त्यसैले यसलाई राष्ट्रिय विकासको अभिन्न अंगका रूपमा लिनुपर्ने उनले बताइन्।
अध्यक्ष वैद्यले विद्युतीय सवारीसाधन (इभी), हाइब्रिड र अन्य नयाँ प्रविधिका सवारीसाधनका विषयमा सरकार र उद्योगबीच प्राविधिक बुझाइमा एकरूपता आवश्यक रहेको बताइन्।
यस्ता प्रविधिका लागि भन्सार, कर र नियमनमा स्पष्टता हुनुपर्ने उनको भनाइ छ।
नेपालले आफ्नो सफा ऊर्जा क्षमताको उपयोग गरेर खनिज इन्धनमाथिको निर्भरता घटाउनुपर्ने पनि उनले बताइन्।
त्यसका लागि दिगो मोबिलिटी इकोसिस्टम निर्माण गर्नुपर्ने उनको भनाइ छ।
यसमा सफा सडक, पर्याप्त चार्जिङ पूर्वाधार र दक्ष जनशक्ति आवश्यक पर्ने उनले बताइन्।
अध्यक्ष वैद्यले स्वदेशी उद्योगको विकासमा पनि जोड दिइन्।
ब्याट्री रिसाइक्लिङसम्बन्धी नीति बनाउनुपर्ने उनले बताइन्।
इथानोल मिश्रणको सम्भाव्यताबारे अध्ययन गर्नुपर्ने उनको भनाइ छ।
सहायक उद्योगलाई प्रोत्साहन गर्न सके स्थानीय एसेम्बली र भ्यालु एडिसन बढाउन सकिने उनले बताइन्।
यसले अटोमोबाइल क्षेत्रमा स्वदेशी उद्योगको विस्तारमा सहयोग पुग्ने उनको भनाइ छ।
उनले नेपालमा अन्तर्राष्ट्रिय स्तरका मेला तथा प्रदर्शनी आयोजना गर्न सुविधायुक्त 'एक्जिबिसन एन्ड कन्भेन्सन सेन्टर' आवश्यक रहेको पनि बताइन्।
त्यस्तै, मोबिलिटी एक्स्पोका संयोजक गौरव शारदाले एक्स्पोलाई सुरक्षित, व्यवस्थित र भ्रमणकर्तामैत्री बनाउन विस्तृत तयारी गरिएको बताए।
एक्स्पोमा विद्युत, इन्टरनेट, सुरक्षा, ट्राफिक व्यवस्थापन र अग्नि सुरक्षालाई प्राथमिकतामा राखिएको जानकारी गराए।
त्यसका लागि छुट्टाछुट्टै योजना बनाएर व्यवस्थापन गरिएको उनले बताए।
मनसुनको समय भएकाले प्रदर्शनी स्थललाई पानी प्रतिरोधी बनाइएको उनले बताए।
वर्षाका कारण एक्स्पोमा आउने आगन्तुक र प्रदर्शनीमा राखिएका सामग्रीमा असर नपर्ने गरी व्यवस्थापन गरिएको उनको भनाइ छ।
एक्स्पोमा अपांगता भएका व्यक्तिका लागि पनि विशेष व्यवस्था गरिएको छ। उनीहरूलाई आवश्यक सहायता र गाइडसहित एक्स्पो अवलोकन गर्ने व्यवस्था मिलाइएको उनले बताए।
एक्स्पोमा ४० भन्दा बढी नयाँ उत्पादन सार्वजनिक गरिने उनले बताए। ५५ वटा ब्रान्डका सवारीसाधन एकै ठाउँमा अवलोकन गर्न सकिने उनको भनाइ छ।
एक्स्पोमा दुईपांग्रे, चारपांग्रे र व्यावसायिक सवारीसाधन प्रदर्शनमा राखिएका छन्।
नयाँ उत्पादन र प्रविधिबारे जानकारी लिन पनि आगन्तुकले एक्स्पोलाई उपयोग गर्न सक्ने उनले बताए।
