नेपाल उद्योग वाणिज्य महासंघका अध्यक्ष अञ्जन श्रेष्ठले नेपालमै सवारीसाधन उत्पादन तथा एसेम्बलिङ उद्योग विस्तार गर्न सरकारसँग प्रतिबद्धता गरिरहेको बताएका छन्।
उनले नेपाललाई औद्योगिक राष्ट्र बनाउन सवारीसाधनको स्वदेशी उत्पादनमा जोड दिनुपर्ने बताए।
मंगलबार काठमाडौंमा सुरू भएको दोस्रो नाइमा मोबिलिटी एक्स्पोको उद्घाटन सत्रमा बोल्दै अध्यक्ष श्रेष्ठले नेपालमा गाडीको एसेम्बलिङ उद्योग विस्तार गर्न निजी क्षेत्रलाई प्रोत्साहन गर्नुपर्ने बताए।
यसले औद्योगिक विकाससँगै रोजगारी सिर्जना गर्न सहयोग पुग्ने उनले जानकारी गराए।
नेपालमा सवारीसाधन एसेम्बलिङको सुरूवात भइसकेको उनले बताए। लक्ष्मी ग्रुपअन्तर्गत हुन्डाई, सौरभ ज्योति र शेखर गोल्छालगायत व्यवसायीले यसतर्फ काम अघि बढाइसकेको उनले उदाहरण दिए।
हाल नेपालमा मोटरसाइकलको एसेम्बलिङ बढी भइरहेको उनले बताए।
अब चारपांग्रे सवारीसाधनको एसेम्बलिङ पनि सुरू गर्नुपर्ने उनले जानकारी गराए।
यसका लागि सरकारले विशेष सहुलियत र प्रोत्साहनको नीति ल्याउनुपर्ने उनको भनाइ छ।
नेपालमै उत्पादन तथा एसेम्बलिङ गर्ने उद्योगलाई सरकारले कर, भन्सार र अन्य क्षेत्रमा सहुलियत दिनुपर्ने उनले बताए।
निजी क्षेत्रलाई लगानीका लागि सहज वातावरण बनाउन सके नेपालमा सवारीसाधनसँग सम्बन्धित उद्योग विस्तार गर्न सकिने उनले जानकारी गराए।
अध्यक्ष श्रेष्ठले नाडाले आयोजना गरेका विभिन्न छलफल र सेसनबाट आएका निष्कर्षलाई नेपाल उद्योग वाणिज्य महासंघमार्फत सरकारसम्म पुर्याउने बताए।
नीतिगत सुधारका लागि सरकारसँग निरन्तर पैरवी गर्ने प्रतिबद्धता पनि उनले जनाए।
सरकारले अटोमोबाइल क्षेत्रलाई अझै पनि विलासिताको वस्तु र राजस्व संकलनको स्रोतका रूपमा मात्र हेर्ने गरेको उनले बताए।
यस्तो सोच परिवर्तन गर्नुपर्ने उनले जानकारी गराए।
अटोमोबाइल क्षेत्रलाई उद्योग र अर्थतन्त्रसँग जोडेर हेर्नुपर्ने उनले बताए। निजी क्षेत्रले ठूलो संख्यामा रोजगारी सिर्जना गरिरहेको विषयलाई सरकारले नीतिनिर्माणमा ध्यान दिनुपर्ने उनको भनाइ थियो।
देशमा सिर्जना हुने रोजगारीमध्ये ८६ प्रतिशत रोजगारी निजी क्षेत्रले धानेको उनले बताए।
निजी क्षेत्रको योगदानलाई सरकारले मनन गर्नुपर्ने उनले जानकारी गराए।
सडक पूर्वाधारको अवस्थाप्रति पनि उनले प्रश्न उठाए।
पछिल्लो २५ वर्षमा सवारीसाधनको संख्या निकै बढेको उनले बताए। तर सोहीअनुसार सडक विस्तार हुन नसकेको उनले जानकारी गराए।
फ्लाई ओभरलगायत पूर्वाधार विस्तारका योजना कागजमै सीमित हुने गरेको उनले बताए। सडकको खराब अवस्था पनि सडक दुर्घटनाको एउटा मुख्य कारण बनेको उनले जानकारी गराए।
सवारीसाधनको संख्या बढे पनि त्यसअनुसार ट्राफिक व्यवस्थापन हुन नसकेको उनले बताए।
काठमाडौंमा अहिले करिब ५०० देखि ६०० जना ट्राफिक प्रहरी मात्र रहेको उनले जानकारी गराए।
पछिल्लो १० देखि १५ वर्षदेखि ट्राफिक प्रहरीको संख्या लगभग स्थिर रहेको उनले बताए।
सवारीसाधनको बढ्दो संख्यासँगै ट्राफिक व्यवस्थापनका लागि जनशक्ति र प्रविधि थप्नुपर्ने उनले जानकारी गराए।
सरकारको अस्थिर नीतिले पनि व्यवसायीलाई समस्या पारेको उनले बताए। कुनै अध्ययन वा तर्कबिना सार्वजनिक सवारीसाधनको दर्ता हठात् रोक्ने र फेरि खोल्ने प्रवृत्तिले व्यवसायीमा अन्योल सिर्जना गरेको उनले जानकारी गराए।
नीति बनाउँदा अध्ययन र सरोकारवालासँगको परामर्श आवश्यक रहेको उनले बताए।
स्थिर र पूर्वानुमानयोग्य नीतिले मात्र निजी क्षेत्रलाई दीर्घकालीन लगानीका लागि प्रोत्साहित गर्ने उनले जानकारी गराए।
चार्जिङ पूर्वाधार विस्तारमा पनि निजी क्षेत्रलाई प्राथमिकता दिनुपर्ने उनले बताए।
चार्जिङ स्टेसन बनाउन सरकारले आफैँ लगानी गर्नुभन्दा निजी क्षेत्रलाई उपकरण आयातमा विशेष सहुलियत दिनुपर्ने उनले जानकारी गराए। यसले निजी लगानी आकर्षित गर्ने उनले बताए।
सरकारले आफैँ उद्योग सञ्चालन गर्नेभन्दा निजी क्षेत्रलाई उत्पादन र एसेम्बलिङमा प्रोत्साहन गर्नुपर्ने उनले बताए।
कपडा वा औषधिजस्ता उद्योगमा सरकारले उद्योग सञ्चालन गर्नुभन्दा निजी क्षेत्रलाई 'कन्ट्र्याक्ट म्यानुफ्याक्चरिङ' र एसेम्बलिङमा प्रोत्साहन गर्नुपर्ने उनले जानकारी गराए।
सरकारी उद्योगलाई दिइने अनुदानले निजी क्षेत्रसँगको प्रतिस्पर्धालाई असहज बनाएको उनले बताए।
निजी क्षेत्रलाई प्रतिस्पर्धी बनाउने नीति आवश्यक रहेको उनले जानकारी गराए।
ब्याट्री आयात र व्यवस्थापनमा पनि सचेत हुनुपर्ने उनले बताए। राजस्वको लोभमा नेपाललाई ब्याट्रीको 'डम्पिङ साइट' बन्न दिन नहुने उनले जानकारी गराए।
पुराना तथा प्रयोग भइसकेका ब्याट्रीको व्यवस्थापन र रिसाइक्लिङका लागि स्पष्ट नीति आवश्यक रहेको उनले बताए।
नक्कली पार्टपुर्जाको आयातमा पनि कडा निगरानी गर्नुपर्ने उनले जानकारी गराए।
नक्कली पार्टपुर्जाले उपभोक्ताको सुरक्षा र सवारीसाधनको विश्वसनीयतामा असर पार्ने उनले बताए।
नेपालमा सवारीसाधनको बजार विस्तारसँगै स्वदेशी उद्योगको आधार पनि बलियो बनाउनुपर्ने उनले बताए।
एसेम्बलिङबाट सुरू गरेर क्रमशः स्थानीय उत्पादन र भ्यालु एडिसन बढाउनु पर्ने उनको भनाइ छ।
नेपालमै सवारीसाधन उत्पादन र एसेम्बलिङ उद्योग विस्तार गर्न सके रोजगारी सिर्जना हुने, सीप विकास हुने र औद्योगिक आधार बलियो बन्ने उनले बताए।
त्यसका लागि सरकार र निजी क्षेत्रबीच सहकार्य आवश्यक रहेको उनले जानकारी गराए।
