भारतीय विद्युतीय सवारी निर्माता रिभर मोबिलिटीले बनाएको इलेक्ट्रिक स्कुटर 'रिभर इन्डी' नेपाली बजारमा उपलब्ध छ।
फरक डिजाइन, ठूलो स्टोरेज र शक्तिशाली मोटरका कारण यो स्कुटरले अन्य विद्युतीय स्कुटरभन्दा अलग पहिचान बनाएको छ।
कम्पनीले इन्डीलाई दैनिक आवतजावतका साथै सामान बोक्नसमेत सहज हुने गरी डिजाइन गरेको छ। यही कारण यसलाई कतिपयले 'स्कुटरको एसयुभी' समेत भन्ने गरेका छन्।
इन्डीमा ४ किलोवाट आवर क्षमताको ब्याट्री छ। कम्पनीका अनुसार एक पटक पूर्ण चार्ज गर्दा यसले अधिकतम १६० किलोमिटरसम्मको रेन्ज दिन सक्छ।
तर यो रेन्ज प्रयोग गर्ने मोडअनुसार फरक हुन्छ। इको मोडमा ११० किलोमिटर, राइड मोडमा ९० किलोमिटर र रश मोडमा ७० किलोमिटरसम्म चल्ने कम्पनीको दाबी छ।
स्कुटरमा ६.७ किलोवाटको पिक पावर उत्पादन गर्ने मिड-ड्राइभ मोटर छ। यसले २६ एनएम टर्क उत्पादन गर्छ। यसको अधिकतम गति ९० किलोमिटर प्रतिघण्टा छ।
कम्पनीका अनुसार इन्डीले शून्यदेखि ४० किलोमिटर प्रतिघण्टाको गति ३.७ सेकेन्डमै लिन सक्छ। यसले १८ डिग्रीसम्मको उकालो चढ्न सक्ने क्षमता राख्छ।
रिभर इन्डीको मुख्य विशेषतामध्ये यसको स्टोरेज क्षमता पनि हो। यसमा सिटमुनि ४३ लिटर र अगाडिको ग्लोभ बक्समा १२ लिटर गरी कुल ५५ लिटर स्टोरेज क्षमता छ।
सामान बोक्नुपर्ने प्रयोगकर्तालाई लक्षित गर्दै कम्पनीले स्कुटरमा ब्याग ह्याङ्गर, प्यानियर माउन्ट र अन्य एक्सेसोरी माउन्टको व्यवस्था गरेको छ।
यसका कारण दैनिक किनमेलदेखि सामान ओसारपसारसम्मका लागि इन्डी प्रयोग गर्न सकिने कम्पनीको दाबी छ।
इन्डीमा इको, राइड र रश गरी तीनवटा राइडिङ मोड छन्।
इको मोडमा यसको अधिकतम गति ५० किलोमिटर प्रतिघण्टा छ भने राइड मोडमा ८० र रश मोडमा ९० किलोमिटर प्रतिघण्टासम्म पुग्छ।
स्कुटरमा सिंगल-स्पिड गियरबक्स र चेन ड्राइभ प्रयोग गरिएको छ।
ब्रेकिङका लागि अगाडि र पछाडि डिस्क ब्रेक दिइएको छ। यसमा कम्बाइन्ड ब्रेकिङ सिस्टमसँगै रिजेनेरेटिभ ब्रेकिङ प्रणाली पनि छ।
रिभर इन्डीमा ७५० वाटको चार्जर प्रयोग गर्दा करिब पाँच घण्टामा ब्याट्री ८० प्रतिशतसम्म चार्ज गर्न सकिने कम्पनीले जनाएको छ।
यसमा ब्याट्री र मोटरलाई पानी तथा धुलोबाट जोगाउन आईपी६७ रेटिङ दिइएको छ।
स्कुटरमा ६ इन्चको कलर डिजिटल डिस्प्ले छ। ट्विन-बीम एलइडी हेडलाइट, एलइडी टेललाइट र एलइडी इन्डिकेटर प्रयोग गरिएको छ।
यसमा १४ इन्चका एलोय ह्विल प्रयोग गरिएको छ। स्कुटरको अगाडिको भागमा छुट्टै फुटपेगसमेत राखिएको छ।
यसले चालकलाई लामो दूरीको यात्रामा खुट्टा राख्ने थप विकल्प दिन्छ।
