इटालियन प्रिमियम मोटरसाइकल ब्रान्ड मोर्बिडेलीले नेपाली बजारमा नयाँ एड्भेन्चर मोटरसाइकल टी २५० एक्स सार्वजनिक गरेको छ।
नेपालका लागि आधिकारिक बिक्रेता बैद्यज अर्गनाइजेशनले मंगलबारदेखि सुरू भएको दोस्रो संस्करणको 'नाइमा मोबिलिटी एक्स्पो २०२६' को अवसरमा यो मोटरसाइकल सार्वजनिक गर्दै बिक्रीसमेत सुरू गरेको हो।
कम्पनीले टी २५० एक्सको मूल्य ६ लाख २० हजार रूपैयाँ तोकेको छ।
यो नेपाली बजारमा उपलब्ध मोर्बिडेलीको सबैभन्दा किफायती मोडल हो। यसअघि कम्पनीले नेपाली बजारमा टी ३५२ एक्स, टी ५०२ एक्स र टी १००२ भीएक्स सुपर एड्भेन्चर बिक्री गर्दै आएको थियो।
टी २५० एक्समा २४९.४ सीसीको सिंगल सिलिन्डर, फोर–भल्भ, एयर–कुल्ड इएफआई इन्जिन छ।
यसले ७ हजार ५ सय आरपीएममा २२.४ हर्सपावर र ६ हजार आरपीएममा २२.३ एनएम टर्क उत्पादन गर्छ।
यसमा ६–स्पिड गियरबक्स छ भने अधिकतम गति करिब ११५ किलोमिटर प्रतिघण्टा रहेको कम्पनीले जनाएको छ।
मोटरसाइकलमा लङ–ट्राभल यूएसडी फ्रन्ट फोर्क र रियर प्रिलोड एड्जस्टेबल मोनोसक दिइएको छ।
अगाडिको सस्पेन्सन ट्राभल १७७ मिलिमिटर र पछाडिको ५५ मिलिमिटर छ। स्पोक ह्विल, डिस्क ब्रेक र डुअल–पर्पस टायरका कारण यसलाई सडकसँगै सामान्य अफरोड यात्राका लागि पनि प्रयोग गर्न सकिने कम्पनीको भनाइ छ।
१५४ किलोग्राम तौल रहेको टी २५० एक्सको ग्राउण्ड क्लियरेन्स २२० मिलिमिटर र सिट हाइट ८२० मिलिमिटर छ।
यसमा ११.७ लिटर क्षमताको फ्युल ट्यांक छ।
एड्भेन्चर तथा टुरिङमा रुचि राख्ने ग्राहकलाई लक्षित गरी ल्याइएको टी २५० एक्सले नेपाली बजारमा किफायती मूल्यमा एड्भेन्चर मोटरसाइकल खोज्ने ग्राहकलाई लक्षित गरेको बैद्यज अर्गनाइजेशनले जनाएको छ।
