भारतीय अटोमोबाइल कम्पनी टाटा मोटर्सले आफ्नो लोकप्रिय कम्प्याक्ट विद्युतीय एसयुभी 'पन्च इभी' को नयाँ मोडल नेपालमा सार्वजनिक गरेको छ।
भृकुटीमण्डपमा मंगलबारबाट सुरू भएको 'नाइमा नेपाल मोबिलिटी एक्स्पो २०२६' मा टाटाको नेपालका लागि आधिकारिक बिक्रेता सिप्रदी ट्रेडिङले उक्त गाडी सार्वजनिक गरेको हो।
बाहिरी बनावट, ब्याट्री क्षमता, रेन्ज, चार्जिङ प्रविधि, भित्री इन्टेरियर र सुरक्षा फिचर्समा व्यापक सुधारसहित आएको यो मोडल अघिल्लो संस्करणको तुलनामा थप अत्याधुनिक र प्रविधियुक्त छ।
ब्याट्री, रेन्ज र चार्जिङ
यसअघि नेपालमा २५ र ३५ किलोवाट आवर ब्याट्रीमा उपलब्ध पन्च इभीको नयाँ फेसलिफ्ट मोडलमा भने ३० र ४० किलोवाट आवरका ब्याट्री विकल्प उपलब्ध छन्।
४० किलोवाट आवर ब्याट्री क्षमताको भेरियन्टले एआरएआई परीक्षण अनुसार एकपटकको फुल चार्जमा ४६८ किलोमिटरसम्मको रेन्ज दिने कम्पनीको दाबी छ। त्यस्तै, ३० किलोवाट आवर ब्याट्रीले ३६५ देखि ३७५ किलोमिटरसम्म रेन्ज दिन्छ।
यो रेन्ज मौसम, एसी प्रयोग र ड्राइभिङ शैलीका आधारमा केही फरक पर्न सक्छ। नेपाली सडकमा ३०० देखि ३२५ किलोमिटरसम्म रेन्ज दिने कम्पनीले जनाइको छ।
यो गाडीमा डिसी फास्ट चार्जिङ सुविधा छ, जसबाट २० देखि ८० प्रतिशतसम्म ब्याट्री करिब २६ मिनेटमै चार्ज गर्न सकिन्छ।
कम्पनीका अनुसार १५ मिनेटको द्रुत चार्जिङबाटै करिब १३५ किलोमिटर यात्रा गर्न सकिने सुविधा छ। घरमै ७.२ किलोवाटको एसी चार्जर प्रयोग गर्दा ३० किलोवाट आवर ब्याट्रीलाई साढे चार घन्टा र ४० किलोवाट आवर ब्याट्रीलाई साढे पाँच घन्टा लाग्छ।
यसका साथै, गाडीको गति घटाउँदा वा ब्रेक लगाउँदा उत्पन्न हुने ऊर्जालाई पुन: ब्याट्रीमा फर्काउने चार तहको 'रेजेनेरेटिभ ब्रेकिङ सिस्टम' पनि यसमा समावेश छ।
शक्ति र कार्यक्षमता
टाटाको यो गाडीमा ४० किलोवाट आवर ब्याट्री भेरियन्टमा जडान गरिएको इलेक्ट्रिक मोटरले १२९ हर्सपावर र १५४ एनएम टर्क पैदा गर्छ। यसले
शून्यदेखि १०० किलोमिटर प्रतिघन्टाको गति मात्र ९ सेकेन्डमा समात्न सक्छ।
चालकको आवश्यकता अनुसार प्रयोग गर्न इको, सिटी र स्पोर्ट गरी तीनवटा ड्राइभिङ मोड उपलब्ध छन्।
नेपाली सडक अनुकूल डिजाइन गरिएको यो गाडीको लम्बाइ ३.८८ मिटर, चौडाइ १.७४२ मिटर, उचाइ १.६२२ मिटर र ह्विलबेस २.४४५ मिटर छ। १९५ मिलिमिटरको ग्राउन्ड क्लियरेन्स र ४५० मिलिमिटरको वाटर-वेडिङ क्षमताका कारण नेपालका उबडखाबड, कच्ची सडक तथा स्पिड ब्रेकरहरूमा यो सहजै चलाउन सकिन्छ।
इन्टेरियर, फिचर्स र सुरक्षा
पाँच सिट क्षमता र ३६६ लिटरको बुट स्पेस रहेको यस गाडीको भित्री भागलाई निकै प्रविधियुक्त बनाइएको छ। क्याबिनमा १०.२५ इन्चको टचस्क्रिन इन्फोटेनमेन्ट सिस्टम र १०.२५ इन्चकै डिजिटल इन्स्ट्रुमेन्ट क्लस्टर छ।
यसका साथै वायरलेस एन्ड्रोइड अटो र एप्पल कारप्ले, वायरलेस फोन चार्जिङ, अटोमेटिक क्लाइमेट कन्ट्रोल, एम्बियन्ट लाइटिङ, भेन्टिलेटेड फ्रन्ट सिट, भ्वाइस-असिस्टेड इलेक्ट्रिक सनरूफ तथा ३६० डिग्री क्यामरा, अगाडि-पछाडि पार्किङ सेन्सर र ब्लाइन्ड भ्यु मनिटर जस्ता आधुनिक सुविधाहरू उपलब्ध छन्।
सुरक्षा दृष्टिले नयाँ पन्च इभीमा ६ वटा एयरब्याग, इलेक्ट्रोनिक स्टेबिलिटी कन्ट्रोल, हिल होल्ड असिस्ट, टायर प्रेसर मनिटरिङ सिस्टम र आइसोफिक्स चाइल्ड सिट माउन्ट दिइएको छ।
वारेन्टी र मूल्य
कम्पनीले ४० किलोवाट आवर ब्याट्री भेरियन्टका लागि पहिलो ग्राहकलाई लाइफटाइम अनलिमिटेड किलोमिटर ब्याट्री वारेन्टीको आकर्षक अफर प्रस्तुत गरेको छ।
नेपालमा नयाँ फेसलिफ्ट पन्च इभीको मूल्य भेरियन्ट अनुसार तय हुनेछ। यसअघि नेपालमा बिक्री भइरहेको पुरानो मोडलको मूल्य ३४ लाख ९९ हजारदेखि ३९ लाख ९९ हजार रूपैयाँसम्म थियो।
