नाइमा नेपाल मोबिलिटी एक्स्पो २०२६ मा एथरले आफ्नो नयाँ ४५० सिरिजका तीन थरीका इलेक्ट्रिक स्कुटर सार्वजनिक गरेको छ।
कम्पनीले एथर ४५० सिरिजलाई स्पोर्टी डिजाइन, उच्च प्रदर्शन र स्मार्ट प्रविधिमा केन्द्रित स्कुटरका रूपमा प्रस्तुत गरेको हो।
यस सिरिजअन्तर्गत ४५०एस, ४५०एक्स २.९ किलोवाट–घन्टा र ४५०एक्स ३.५ किलोवाट–घन्टा गरी तीन भेरियन्टका स्कुटर छन्।
यी तीनै स्कुटर हेर्दा बाहिरबाट धेरै फरक देखिँदैनन्। तर ब्याट्रीको क्षमता, पावर, रेन्ज र चार्ज हुन लाग्ने समयमा फरक छ।
४५०एसमा २.९ किलोवाट–घन्टा ब्याट्री दिइएको छ। यसले अधिकतम ५.४ किलोवाट पावर र २२ एनएम टर्क उत्पादन गर्छ। यहाँ 'पावर' भनेको स्कुटरले कति शक्तिका साथ काम गर्न सक्छ भन्ने हो। त्यस्तै, टर्क भनेको स्कुटरले सुरूमा कति गति लिन सक्छ भन्ने हो।
४५०एसले शून्यदेखि ४० किलोमिटर प्रतिघन्टाको गति ३.९ सेकेन्डमा लिन सक्छ। यसको अधिकतम गति ९० किलोमिटर प्रतिघन्टा छ।
कम्पनीका अनुसार यसले एकपटक पूरा चार्ज गर्दा १२२ किलोमिटरसम्म यात्रा गर्न सक्छ। घरमै चार्ज गर्दा ० देखि ८० प्रतिशतसम्म चार्ज हुन करिब साढे ५ घन्टा लाग्छ। यसको मूल्य ३ लाख ३४ हजार ९ सय रूपैयाँ पर्छ।
त्यसपछि आउँछ ४५०एक्स। यसको पनि २.९ किलोवाट–घन्टा क्षमताकै ब्याट्री छ। तर ४५०एसको तुलनामा यसको पावर र टर्क बढी छ।
यसले ६.४ किलोवाट पावर र २६ एनएम टर्क दिन्छ। ० देखि ४० किलोमिटर प्रतिघन्टाको गति ३.३ सेकेन्डमा लिन सक्छ। यसको अधिकतम गति पनि ९० किलोमिटर प्रतिघन्टा हो। यसको रेन्ज १२६ किलोमिटरसम्म रहेको कम्पनीको दाबी छ।
यो मोडलको अर्को फाइदा छिटो चार्जिङ हो। घरमै चार्ज गर्दा ० देखि ८० प्रतिशतसम्म पुग्न करिब ३ घन्टा लाग्छ। यसको मूल्य ३ लाख ९९ हजार ९ सय रूपैयाँ पर्छ।
अब कुरा गरौं, ४५० सिरिजको ठूलो ब्याट्री भएको मोडलको।
४५०एक्स ३.७ मा ३.७ किलोवाट–घन्टा क्षमताको ब्याट्री दिइएको छ। २.९ किलोवाट–घन्टा संस्करणभन्दा यसको ब्याट्री ठूलो भएकाले यसले बढी ऊर्जा जम्मा गर्न सक्छ।
यसमा पनि ६.४ किलोवाट पावर र २६ एनएम टर्क छ। यसले ० देखि ४० किलोमिटर प्रतिघन्टाको गति ३.३ सेकेन्डमै लिन सक्छ भने अधिकतम गति ९० किलोमिटर प्रतिघन्टा नै छ। तर रेन्जमा ठूलो फरक छ।
कम्पनीका अनुसार ४५०एक्स ३.७ किलोवाट–घन्टाले एकपटक चार्जमा १६१ किलोमिटरसम्म यात्रा गर्न सक्छ।
यसको ब्याट्री ठूलो भएकाले चार्ज हुन पनि केही बढी समय लाग्छ। घरमा चार्ज गर्दा ० देखि ८० प्रतिशतसम्म पुग्न करिब ४ घन्टा ३० मिनेट लाग्छ। यसको मूल्य ४ लाख ३४ हजार ९ सय रूपैयाँ पर्छ।
यी स्कुटरलाई घरमै चार्ज गर्न सकिन्छ। त्यसका लागि कम्पनीले पोर्टेबल चार्जर उपलब्ध गराएको छ।
चार्ज गर्ने समय मोडल अनुसार फरक छ। ४५०एसलाई ० देखि ८० प्रतिशतसम्म चार्ज गर्न करिब ५ घन्टा ३० मिनेट, ४५०एक्स २.९ किलोवाट–घन्टालाई ३ घन्टा र ४५०एक्स ३.७ किलोवाट–घन्टालाई ४ घन्टा ३० मिनेट लाग्छ।
सहरमा दैनिक चलाउन र बजेटलाई प्राथमिकता दिने हो भने ४५०एस रोज्न सकिन्छ। अलि बढी पावर र छिटो चार्जिङ चाहिने हो भने ४५०एक्स २.९ किलोवाट–घन्टा उपयुक्त हुन्छ। लामो दूरीमा चलाउनुपर्ने र धेरै रेन्ज चाहिने हो भने ४५०एक्स ३.७ किलोवाट–घन्टा राम्रो विकल्प हुन्छ।
छोटोमा भन्नुपर्दा, ब्याट्रीको किलोवाट–घन्टा जति ठूलो भयो, सामान्य अवस्थामा एकपटक चार्जमा त्यति धेरै दूरी पार गर्न सकिन्छ। तर वास्तविक रेन्ज स्कुटरको गति, बाटो, मौसम र चलाउने तरिका अनुसार फरक पर्छ।
एथरले दिने वारेन्टी कति छ?
एथरले ४५० सिरिजका स्कुटरमा ३ वर्ष वा ३० हजार किलोमिटरको वारेन्टी दिएको छ। यसको अर्थ, स्कुटर किनेको ३ वर्ष पूरा हुनुअघि नै ३० हजार किलोमिटर पुगेमा वारेन्टी त्यही बेला सकिन्छ।
त्यस्तै, ३ वर्ष पुगिसक्यो तर ३० हजार किलोमिटर चलेको छैन भने पनि वारेन्टी सकिन्छ।
ब्याट्रीका लागि भने कम्पनीले अतिरिक्त योजना पनि ल्याएको छ। यसअन्तर्गत ८ वर्ष वा ८० हजार किलोमिटरसम्मको कभरेज पाउन सकिन्छ।
यी स्कुटरलाई अरू एपसँग जोड्ने सुविधा पनि छ। एपबाट स्कुटरको चार्ज कति बाँकी छ, स्कुटर कहाँ छ, पछिल्लो पटक कहाँ पार्क गरिएको थियो लगायत थाहा पाउन सकिन्छ। यसले स्कुटरको प्रयोग र अवस्थाबारे मोबाइलबाटै जानकारी लिन सजिलो बनाउँछ।
सुरक्षाका लागि पनि यस ४५० सिरिजमा विभिन्न सुविधा दिइएका छन्।
'इमर्जेन्सी स्टप' पनि यो स्कुटर सिरिजको महत्त्वपूर्ण फिचर हो। अचानक कडा ब्रेक लगाउँदा पछाडिबाट आउने चालकलाई सचेत गराउन ब्रेक लाइट छिटो–छिटो बल्छ। यसले पछाडिबाट ठोक्किने सम्भावना कम गर्न मद्दत गर्छ।
त्यस्तै, 'फल सेफ' फिचरले स्कुटर लडेको अवस्थामा मोटर बन्द गर्न मद्दत गर्छ।
'टो एन्ड थिफ्ट अलर्ट' ले स्कुटरलाई कसैले सार्न वा तान्न खोजे अलर्ट दिन्छ। यसले स्कुटर चोरी वा अनधिकृत रूपमा सारिने अवस्थामा जानकारी पाउन सहयोग गर्छ।
'अटो होल्ड' ले उकालो वा ट्राफिकमा स्कुटर रोक्दा सहज बनाउँछ। पार्किङ गर्दा 'पार्क असिस्ट' ले पनि सहयोग गर्छ।
