नेपालमा अटोमोबाइल क्षेत्रका व्यवसायीहरूको हकहितका लागि काम गर्ने मुख्य उद्देश्य राखेर स्थापना भएको अटोमोबाइल्स एसोसिएसन अफ नेपाल (नाडा) ले आफ्नो स्थापनाको ५० औं वार्षिकोत्सव (स्वर्ण जयन्ती) मनाइरहेको छ।
स्वर्ण जयन्ती मनाउने क्रममा 'उद्योगदेखि रोजगारसम्म' भन्ने मूल नाराका साथ नाडा अटो शोको १८औं संस्करण आगामी मंगलबारदेखि काठमाडौँको भृकुटीमण्डपमा आयोजना हुँदैछ।
नाडाको जन्म कसरी भयो?
नेपालमा बिस्तारै सवारी साधनको आयात बढेसँगै व्यवसायीहरूले आफ्नो हक र हितका लागि काम गर्ने एक मञ्चको आवश्यकता महसुस गरे र व्यवसायी तोलाराम दुगडको अध्यक्षतामा २०३२ सालमा अटोमोबाइल एसोसिएसन अफ नेपालको स्थापना भयो।
बिस्तारै संस्थाको कार्यक्षेत्र र दायरा फराकिलो बनाउन २०६१/६२ मा आइपुग्दा यो संस्थाको नाम नेपाल अटोमोबाइल्स डिलर एसोसिएसन (नाडा) भयो।
त्यस्तै २०७२ सालमा संस्थाले आफ्नो नाम पुनः परिवर्तन गरी नाडा अटोमोबाइल्स एसोसिएसन अफ नेपाल राखेको हो।
बजार व्यवस्थित गर्ने, सरकारसँग नीतिगत पैरवी गर्ने र समग्र नेपाली अर्थतन्त्र र रोजगारीको सिर्जना गर्ने तथा व्यवसायीहरूको एकआपसमा नेटवर्क वृद्धि गरी उपभोक्तासम्म सहज पहुँच पुर्याउने उद्देश्यका साथ नाडाको स्थापना भएको थियो।
संस्थाको विकाससँगै नाडाको उद्देश्य र कामको दायराहरू पनि फराकिलो बन्दै गए।
नाडाले अटोमोबाइल व्यवसायीहरूको साझा आवाज संस्थागत गर्दै सरकार र निजी क्षेत्रबीच संवादको महत्त्वपूर्ण पुलको भूमिका निर्वाह गर्दै आएको छ।
नाडासँग देशभरका अटोमोबाइल व्यवसायी, आयातकर्ता, वितरक, उत्पादक तथा डिलरहरू जोडिएका छन्।
नाडाका अध्यक्ष सुरेन्द्रकुमार उप्रेती नाडाको ५० वर्षको सबैभन्दा ठूलो उपलब्धि गाडी बेच्ने व्यवसायीहरूको संगठनलाई नेपालकै अटोमोबाइल उद्योगको प्रतिनिधित्व गर्ने, सरकारसँग नीति संवाद गर्ने, बजार र प्रविधि प्रदर्शन गर्ने, सीप विकास गर्ने तथा अन्तर्राष्ट्रिय उद्योगसँग जोड्ने संस्थागत प्लेटफर्ममा रूपान्तरण गर्न सक्नु रहेको बताउँछन्।
'नाडाले पचास वर्षे यात्रामा नीति पैरवी, उद्योगको प्रतिनिधित्व, अटो शो, सूचना अभिलेख, सीप विकास, अन्तर्राष्ट्रिय सम्बन्ध र ईभी र हरित मोबिलिटीजस्ता क्षेत्रमा कामहरू गरेको छ। अब नेपाल केवल गाडी आयात गर्ने देश होइन, मोबिलिटी इकोसिस्टम निर्माण गर्ने देश बन्ने दिशामा सोच्नुपर्छ,' उनले भने।
यसरी सुरूआत भएको थियो नाडा अटो शो
अटोमोबाइल व्यवसाय विस्तार हुन थालेसँगै व्यवसायीहरूलाई आफ्नो उत्पादन तथा ब्रान्ड प्रदर्शन गर्ने र उपभोक्तालाई नयाँ सवारी साधनबारे जानकारी दिने एउटा व्यवस्थित मञ्चको आवश्यकता महसुस भयो।
यही आवश्यकता पूरा गर्न नाडाले २०५५ सालामा पहिलो अटो शो आयोजना गरेको थियो। सो मेलामा जम्मा २६ वटा स्टलहरू थिए।
प्रत्येक २ वर्षमा हुने नाडा अटो शोमा ग्राहकको आकर्षण बढेसँगै सन् २०१० (२०६७ साल) देखि प्रत्येक वर्ष नेपालीहरूका ठूला चाडपर्वलाई लक्षित गरी प्रत्येक वर्ष आयोजना गर्न थालियो।
यस पटक प्रत्येक वर्ष हुने नाडा अटो शोको १८ औं संस्करण भदौ ९ गतेदेखि सुरू हुँदैछ।
नाडा अटो शो व्यावसायिक मञ्चमा परिणत हुँदै गएको अध्यक्ष उप्रेतीले दाबी गरे।
उनले भने, 'नाडा अटो शो नयाँ गाडी सार्वजनिक गर्ने, ब्रान्ड प्रवर्द्धन गर्ने, ग्राहकसँग प्रत्यक्ष सम्पर्क गर्ने, बैंक तथा वित्तीय संस्थालाई अटो लोन प्रवर्द्धन गर्ने र अटोमोबाइल क्षेत्रका नयाँ प्रविधि देखाउने प्रमुख मञ्च बन्दै गएको छ।'
उनका अनुसार अहिले नाडाले नेपाली बजारमा छुट्टै संस्थागत पहिचान बनाएको छ। सरकारसँग नीतिगत बहस र पैरवीहरू गरिरहेको छ। संस्थामा ३ हजार २ सयभन्दा बढी सदस्यहरू रहेका छन्।
नाडाले आफ्नो गौरवपूर्ण यात्रामा सडक सुरक्षा र दुर्घटना न्यूनीकरणमा पनि चेतनामूलक कामहरू गर्दै आएको छ।
भदौ ९ देखि भृकुटीमण्डपमा हुँदै छ नाडा अटो शोको १८ औं संस्करण
अटोमोबाइल एसोसिएसन अफ नेपाल (नाडा) ले भदौ ९ गतेदेखि १८ औं संस्करणको नाडा अटो शो आयोजना गर्न लागेको छ। साथै स्थापनाको ५० औं वर्ष (स्वर्ण जयन्ती) पनि मनाउँदै छ।
नेपालको अटोमोबाइल क्षेत्रमा भइरहेको द्रुत परिवर्तन, विशेषगरी इभीको आधुनिक प्रविधि र दिगो गतिशीलतालाई एउटै छानामुनि प्रदर्शन गर्ने यो एउटा भव्य मञ्च हुनेछ।
५ दशक लामो नाडाको यात्रा नेपालको समग्र आर्थिक र औद्योगिक विकाससँग जोडिएको हामीले देखेकै छौं।
साथै, यस वर्षको संस्करण अटोमोबाइल क्षेत्रका लागि ऐतिहासिक कोसेढुङ्गा साबित हुने हाम्रो विश्वास छ।
यस वर्षको प्रदर्शनीमा विद्युतीय सवारी साधन (इभी) लाई विशेष प्राथमिकता दिइएको छ। दुईपांग्रे, चारपांग्रे, कमर्सियलदेखि कम्पोनेन्टसम्मको विकासक्रम मेलामा प्रदर्शनी हुनेछ।
नेपालमै उत्पादित सवारी साधनलाई प्राथमिकतामा
यस पटकको प्रदर्शनीमा नेपालमै उत्पादित यात्री इलेक्ट्रिक साथै स्वदेशमै एसेम्बल गरिएका स्कुटर, बाइक, टायर, लुब्रिकेन्ट, ब्याट्री र स्पेयर पार्ट्सहरूलाई मुख्य आकर्षणका रूपमा प्रस्तुत गर्न लागिएको छ।
नेपाल अब गाडी आयात गर्ने मात्र होइन, भोलिका दिनमा उत्पादनमा पनि आत्मनिर्भर बन्न सक्छ भन्ने स्पष्ट सन्देश अवलोकनकर्तालाई अटो शोमा दिन खोजिएको छ।
स्वदेशी उद्योगतर्फको यात्रालाई संस्थाले गर्वका साथ प्रदर्शनीमा राख्न लागेको छ।
यस अटो शोले देशको अर्थतन्त्रलाई गति दिन र अटोमोबाइल क्षेत्रको भविष्यको दिशा तय गर्न सहयोग पुर्याउने नाडाले अपेक्षा गरेको छ।
नेपाली अटोमोबाइल बजारमा 'नाडा अटो शो' एउटा प्रदर्शनी मात्र होइन, उद्योगको अवस्था, उपभोक्ताको रुचि र आगामी दिनको दिशासमेत देखाउने मञ्चका रूपमा स्थापित छ।
यही कारण १८ औं नाडा अटो शो २०२६ लाई नाडाले आफ्नो ५०औं स्थापना वर्षको स्वर्ण जयन्तीसँग जोडेर अझ फराकिलो सन्देश दिने गरी तयारी गरेको हो।
भदौ ९ देखि १४ गतेसम्म काठमाडौँको भृकुटीमण्डपमा हुने प्रदर्शनीमा २०० भन्दा बढी स्टल रहनेछन्।
करिब ३ लाख वर्गफिट क्षेत्रमा फैलिने अटो शोमा २३ ब्रान्डका प्यासेन्जर कार, १७ ब्रान्डका लाइट कमर्सियल भेइकल, १३ ब्रान्डका दुईपांग्रे सवारीसाधन, ७० वटा अटोमोबाइल पार्टपुर्जा तथा उत्पादनका स्टल र १० वित्तीय तथा बीमा संस्थाको सहभागिता रहनेछ।
त्यस्तै रोबोटिक्स, एआई, डिजिटल प्रविधि र स्वदेशी उत्पादनलाई प्रदर्शनीको केन्द्रमा राखिएको छ।
अध्यक्ष उप्रेतीले ५० औं वर्षको अवसरमा आयोजना हुन लागेको यो संस्करणले नाडाको पाँच दशकको यात्रा र अबको अटोमोबाइल क्षेत्रबीचको सम्बन्ध देखाउने प्रयास गर्ने दाबी गरे।
६ दिनसम्म चल्ने प्रदर्शनीमा करिब २ लाख आगन्तुक आउने आयोजकको अपेक्षा छ। भीड व्यवस्थापनलाई ध्यान दिँदै नेपाल पुलिस क्लब, नेसनल ट्रेडिङ, सुन्धारा, सञ्चय कोष भवन, पुरानो बसपार्क तथा अन्य स्थानमा पार्किङको व्यवस्था गरिनेछ।
बाहिरी पार्किङस्थलबाट भृकुटीमण्डपसम्म निःशुल्क सटल बस सञ्चालन गरिनेछ।
प्रदर्शनीस्थलमा सिसिटिभी निगरानी, ह्विलचेयर सुविधा, आपत्कालीन स्वास्थ्य टोली र ट्राफिक सूचना डेस्क पनि रहनेछन्।
आधिकारिक टिकटिङ पार्टनर खल्तीमार्फत अग्रिम टिकट बुक गर्दा ५० प्रतिशतसम्म क्यासब्याकको व्यवस्था गरिएको आयोजकले जनाएको छ।
भदौ ९ देखि १४ गतेसम्म भृकुटीमण्डपमा हुने अटो शोमा त्यसैले नयाँ गाडी मात्रै देखिने छैनन्। नेपाली अटोमोबाइल उद्योगको वर्तमान अवस्था र आगामी यात्राको एउटा चित्र पनि देखिनेछ।
