चांगनले नाडा अटो शोमा नेभो, दिपल र प्रिमियम ब्रान्ड अवतारका विभिन्न विद्युतीय गाडी प्रदर्शनीमा राखेको छ।
कम्पनीले हालै नेपालमा सार्वजनिक गरेको नेभो क्यू०५ पनि नाडा अटो शोमा प्रदर्शनीमा राखेको छ।
नेभो क्यू०५ कम्प्याक्ट विद्युतीय एसयुभी हो। यसमा ५१.९ किलोवाट आवर क्षमताको ब्याट्री र १२० किलोवाट क्षमताको विद्युतीय मोटर रहेको छ।
नेभो क्यू०५ को डिजाइनमा स्लिक र आधुनिक बडी, सिग्नेचर एलइडी लाइटिङ तथा आकर्षक एसयुभी आकार रहेको छ।
यसमा १४.६ इन्चको एचडी टचस्क्रिन र विभिन्न इन्टेलिजेन्ट ड्राइभिङ असिस्ट प्रणाली पनि उपलब्ध छन्।
कम्पनीले नाडाका लागि नेभो क्यू०५ दुई भेरियन्टमा उपलब्ध गराएको छ।
यसको म्याक्स भेरियन्टको मूल्य ४६ लाख ९९ हजार रूपैयाँ र अल्ट्रा भेरियन्टको मूल्य ४९ लाख ९९ हजार रूपैयाँ रहेको छ।
नाडापछि म्याक्सको मूल्य ४८ लाख ९९ हजार रूपैयाँ र अल्ट्राको ५१ लाख ९९ हजार रूपैयाँ हुने कम्पनीले जनाएको छ।
त्यस्तै, चांगनले दिपल एस०५ पनि प्रदर्शनीमा राखेको छ।
दिपल एस०५ मा ५६.१ किलोवाट आवर क्षमताको एलएफपी ब्याट्री रहेको छ।
यसमा ९९ किलोवाट क्षमताको परमान्ट म्याग्नेट सिन्क्रोनस मोटर प्रयोग गरिएको छ, जसले ३२० न्युटन मिटर टर्क उत्पादन गर्छ।
कम्पनीका अनुसार एस०५ ले एनइडिसी परीक्षणअनुसार एकपटकको फुल चार्जमा ४७० किलोमिटरसम्म यात्रा गर्न सक्छ।
एस०५ को बाहिरी डिजाइनमा फ्रेमलेस ढोका, १८ इन्चको टु–टोन एलोय ह्विल, लुकाइएका डोर ह्यान्डल, एलइडी डेटाइम रनिङ लाइट र स्टार विङ थ्रु टेललाइट उपलब्ध छन्।
यसमा प्यानोरामिक ग्लास रूफसमेत रहेको छ।
नेपालमा एस०५ प्लस र म्याक्स गरी दुई भेरियन्टमा उपलब्ध छ।
कम्पनीको मूल्य सूचीअनुसार प्लसको मूल्य ५७ लाख ९९ हजार रूपैयाँ र म्याक्सको मूल्य ६२ लाख ९९ हजार रूपैयाँ रहेको छ।
त्यस्तै, दिपल एल०७ पनि नाडा अटो शोमा प्रदर्शनीमा राखिएको छ।
एल०७ प्रिमियम इलेक्ट्रिक फास्टब्याक कार हो।
यसमा ६६.८ किलोवाट आवर क्षमताको एनएमसी अर्थात् टर्नरी लिथियम ब्याट्री रहेको छ।
यसमा रहेको परमान्ट म्याग्नेट सिन्क्रोनस मोटरले ३२० न्युटन मिटर टर्क उत्पादन गर्छ।
कम्पनीका अनुसार एल०७ ले एनइडिसी परीक्षणअनुसार एकपटकको फुल चार्जमा ५४० किलोमिटरसम्म यात्रा गर्न सक्छ।
यसको बाहिरी डिजाइनमा फास्टब्याक आकृति, फ्रेमलेस डोर विन्डो, लुकाइएका डोर ह्यान्डल, एलइडी स्टार पेटल डेटाइम रनिङ लाइट, स्टार फ्लेम टेललाइट र १९ इन्चको स्पोर्ट डिजाइन एलोय ह्विल उपलब्ध छन्।
यसमा प्यानोरामिक ग्लास रूफ र पावर फास्टब्याक टेलगेट पनि रहेको छ।
नेपालमा एल०७ को मूल्य ६९ लाख ९९ हजार रूपैयाँ रहेको कम्पनीको वेबसाइटमा उल्लेख छ।
चांगनले आफ्नो प्रिमियम ब्रान्ड अवतारअन्तर्गत अवतार ०७ पनि नाडा अटो शोमा प्रदर्शनीमा राखेको छ।
कम्पनीले अवतार ०७ लाई हालै नेपालमा सार्वजनिक गरेको हो। यो दुई भेरियन्टमा उपलब्ध रहेको कम्पनीले जनाएको छ।
यसको लोअर भेरियन्टको मूल्य २ करोड रूपैयाँ र हाइ भेरियन्टको मूल्य २ करोड ३० लाख रूपैयाँ रहेको छ।
अवतार ०७ को ब्याट्री क्षमता, मोटरको शक्ति र टर्क नेपालमा उपलब्ध दुई भेरियन्टअनुसार फरक हुने भएकाले यसको थप विस्तृत विवरण कम्पनीको आधिकारिक स्पेसिफिकेसनअनुसार पुष्टि हुन बाँकी छ।
नाडा अटो शोका अवसरमा नेभो, दिपल र अवतारका विभिन्न गाडीमा अन्य अफर तथा सुविधासमेत उपलब्ध रहेको कम्पनीले जनाएको छ।
