इरान–इराक सीमानजिक आइतबार बिहानै गएको ६.० म्याग्निच्यूडको शक्तिशाली भूकम्पबाट दुई जनाको मृत्यु हुनुका साथै २ सयभन्दा बढी घाइते भएको स्थानीय अधिकारीहरूले जनाएका छन्।
अमेरिकी भूगर्भीय सर्वेका अनुसार, भूकम्पको केन्द्र इरानको कर्मान्शाह प्रान्तको जभानरुड सहरबाट २६ किलोमिटर पश्चिततर्फ थियो। गत वर्ष यही स्थानमा गएको शक्तिशाली भूकम्पबाट सयौंको ज्यान गएको थियो।
कर्मान्शाह विश्वविद्यालय शिक्षण अस्पतालको आपतकालीन विभागका प्रमुख साइब शारिदारीले दुई जनाको मृत्यु भएको र २४१ जना घाइते भएको जानकारी दिए। घाइतेमध्ये ६ जनाको अवस्था चिन्ताजनक छ।
रेड क्रिसेन्टका प्रान्तीय प्रमुख मोहम्मद रेजा अमिरियानले भूकम्पका कम्तीमा २१ वटा परकम्प महशुस गरिएको जानकारी दिए।
उनले गाउँमा पूर्वाधारमा व्यापक क्षति पुगेकाले खानेपानीको गम्भीर समस्या देखिएको, तर खाद्यान्न र टेन्टहरू भने वितरण गर्नुपर्ने अवस्था नरहेको जानकारी दिए।
कर्मान्शाहका गभर्नर हाउशाङ बाजभान्डले भूकम्प गएपछि धेरै गाउँमा अस्थायी रूपमा विद्युतसेवा कटौती गर्नुपरेको जानकारी दिए। उनले आपतकालीन केन्द्रहरू खोलिएको र अस्पताल तथा राहत संस्थाहरूलाई सावधानी अपनाउन भनिएको बताए।
गत वर्ष नोभेम्बरमा यही क्षेत्रमा ७.३ म्याग्निच्यूडको भूकम्प गएको थियो। भूकम्पमा परेर कर्मान्शाह प्रान्तमा मात्र ६२० जनाको मृत्यु भएको थियो।(रासस/एएफपी)
