२०७२ वैशाख १२ गते आजकै दिन प्रलयकारी भुइँचालो गएको थियो। गोरखा, बारपाकलाई केन्द्रविन्दु बनाएको त्यसदिनको भुइँचालाेले मानवीय र भौतिक क्षतिसँगै मानसिक रुपमा समेत दीर्घकालीन असर छोडेको छ। ती असरहरु सायदै हराउँलान्। त्यो दिनको कम्पन र त्यसपछिका निरन्तर पराकम्पनहरुले हाम्रो मनमा पारेको त्रास सायदै हराउँला।
रक ब्यान्ड 'एएसएम'ले आइतबार त्यही भुइँचालो सम्झँदै नयाँ गीत सार्वजनिक गरेको छ। 'घर' शीर्षकको यो गीतलाई ब्यान्डले बारपाकका मानिसप्रति समर्पित गरेको छ। गीतमा गायक अभिषेककै शब्द-संगीत छ।
२०७२ देखि हरेक वर्षको बैशाख १२ हाम्रा लागि भुइँचालोको विम्ब बनिसकेको छ। घर र घरका सदस्य गुमाएका मान्छेहरुका लागि यो दिन एउटा नमिठो स्मृति बनेर रहिरहनेछ। ५ वर्षअघिको त्यो भुइँचालोमा ७२ जनाको ज्यान गुमाएको बारपाक दु:खको विम्ब मात्र भने होइन। भुइँचालोका घाउहरु पुर्दै क्षतविक्षत बारपाकले नयाँ रुप फेरिइरहेको छ।
घर गीतको भिडिओमा बारपाकका मानिस र उनीहरुको दैनिक जीवनका क्रियाकलाप देखाइएको छ। 'एएसएम'का गायक अभिषेक शंकर मिश्रले भने, 'घर बारपाक र यहाँका मानिसको जीवनलाई चिहाउने आँखिझ्याल हो।'
उनले संगीतले मान्छेको संवेदना अभिव्यक्त गर्ने काम गर्ने बताउँथे थप भने, 'यो गीतले भूकम्पका भोगाइहरुको संवेदना चित्रण गर्दै संकटसँग लडेर फेरि हाँसेर बाँच्न सिकिरहेका बारपाकका मानिसप्रति समर्पित गर्न चाहन्छु।'