आरएल लामा मोक्तान निर्देशित फिल्म 'चोर र पुलिस' को ट्रेलर सार्वजनिक भएको छ।
बिहीबार काठमाडौंमा एक कार्यक्रम आयोजना गर्दै फिल्मको ट्रेलर सार्वजनिक गरिएको हो। सार्वजनिक ट्रेलरमा घरायसी सामानको चोरी र प्रहरीले चोरलाई समात्न गरेको संघर्षलाई देखाइएको छ।
लंका फिल्म्सको प्रस्तुतीमा निर्माण भएको फिल्ममा धिरेन शाक्य, राजेन्द्र खड्गी, बुद्धि तामाङ, जयनन्द लामा, जयकिसन बस्नेत, रवि गिरी, शोभित बस्नेत, रामचन्द्र अधिकारी, सुरवीर पण्डित, जहन्वी बस्नेत, कविता राय, सुलेमान शंकर (इकु), अर्जुन गुरुङ, सुभाष गजुरेल, शारदा गिरी, रश्मी भट्ट, रेशम फिरिरी, मदन ताम्राकार, आरएल लामा, सुशान्त राईलगायत कलाकारको अभिनय छ।
अभिनेता धिरन शाक्य र राजेन्द्र खड्गी लामो समयपछि यो फिल्ममार्फत कमब्याक गर्दैछन्।
आर सोनम मोक्तान र लंकामाया मोक्तानले निर्माण गरेको फिल्मको कार्यकारी निर्माता जीवन लामा हुन्। रामेश्वर हुमागाईंले छायांकन तारा थापा ‘किम्भे’ले सम्पादन गरेका छन्।
यो फिल्म आगामी कात्तिक २५ गतेदेखि प्रदर्शन हुँदैछ।
