भूगर्भविद् तथा अनुसन्धानकर्ता टोनी हागनको पुस्तक ‘बिल्डिङ ब्रिजेज टु द थर्ड वर्ल्ड’ अब नेपाली भाषमा समेत पढ्न पाइने भएको छ। काठमाडौं अन्तर्राष्ट्रिय पर्वतीय फिल्म फेस्टिभल (किम्फ) अन्तर्गत आइतबार पुस्तकको नेपाली संस्करण ‘नेपालमा मेरो खोजी यात्रा’ लोकर्पण गरियो।
हिमाल पुस्तकले प्रकाशित गरेको उक्त पुस्तक टोनी हागनकी छोरी डा. क्याट्रिना हागन र टोनी हागन फाउन्डेसन नेपालका अध्यक्ष प्रमोदकुमार झाले संयुक्त रुपमा लोकर्पण गरे।
पुस्तक किम्फका प्रमुखसमेत रहेका हिमाल एसोसिएसनका अध्यक्ष वसन्त थापाले अनुवाद गरेका हुन्।
पुस्तक लोकार्पण गर्दै हागनकी छोरी क्याट्रिनाले नेपालमा देखिएको प्राकृतिक, सामाजिक र धार्मिक विविधताको चर्चा गरिन्। अनुवादक थापाले पुस्तकको मर्मअनुसार अनुवाद गरेको बताए। ‘अनुवाद साह्रै कठिन काम हो। बरु मौलिकतामा लेख्न सजिलो हुन्छ। अनुवाद लिकमा चल्ने रेल रहेछ’, उनले भने।
हागनले पुस्तकमार्फत नेपालीलाई नेपाल चिन्न आग्रह गरेको बताउँदै थापाले भने, ‘हामीले नेपाल चिन्नु पर्छ। हामी कस्तुरीजस्तै छौं। वैज्ञानिक पद्धति हाम्रो जीवनमा प्रवेश गरेकै छैन। पुस्तकमार्फत् हागनको मुख्य आग्रह भनेकै हामीले नेपाल चिन्नुपर्छ भन्ने हो।’
जलस्रोतलाई सेतो सुनको संज्ञा दिँदै हागनले पुस्तकमा नेपालमा ह्वाइट गोल्डको प्रशस्त सम्भावना रहेको बताए। नेपाललाई बारम्बार स्वीटजरल्यान्डसँग तुलना गरिने गरिएको उल्लेख गर्दै उनले स्वीस नागरिकको परिश्रमबाट नेपालीले सिक्नुपर्ने बताए।
नेपालसहित विश्वका अन्य विकासशील मुलुकहरुमा चार दशकभन्दा बढी समय विशेषज्ञको रुपमा काम गरेका हागनले यसमा नेपाल घुमघाम गर्दा भेटिएका रोचक दृश्य, तथ्य र क्षणलाई उल्लेख गरेका छन्।
हागन पहिलोपटक भूगर्भविद्का रुपमा सन् १९५० मा नेपाल आएका थिए। सरकारको अनुमति बिना विदेशीले काठमाडौंबाहिर यात्रा गर्न नपाउने बेलामा स्वीस टोलीको सदस्य भएको नाताले हागनले त्यतिबेला नेपालको गाउँ चाहर्न पाए।
३ सय १४ पृष्ठको 'नेपालमा मेरो खोज यात्रा' को मूल्य ६ सय ५० रुपैयाँ राखिएको छ। यसअघि हागन लिखित पुस्तक ‘डिसेन्ट्रलाइजेसन एन्ड डेभलपमेन्ट’को नेपाली अनुवाद ‘विकेन्द्रिकरण र विकास’ यसअघि नै प्रकाशित भइसकेको छ।
