नाटक ‘पल्पसा क्याफे’मा नायिका सृष्टि श्रेष्ठले पल्पसाको भूमिका निभाउने भएकी छन्। अघिल्लो वर्ष यो भूमिका स्वस्तिमा खड्काले खेल्ने सार्वजनिक भए पनि उनको स्थान श्रेष्ठले लिने भएकी हुन्।
कोभिड महामारीको कारण अघिल्लो वर्ष प्रदर्शन हुनबाट रोकिएको थिएटर भिलेजको नाटक ‘पल्पसा क्याफे’ यही वैशाख ९ गतेबाट काठमाडौँमा प्रदर्शन हुने भएको छ। नारायण वाग्लेको मदन पुरस्कार प्राप्त उपन्यास ‘पल्पसा क्याफे’ मा आधारित भएर बनाइएको उक्त नाटक काठमाडौंको थापागाउँस्थित मण्डला थिएटरमा वैशाखभर प्रदर्शन हुने भएको छ। अहिले नाटकको तयारी तिब्र गतिमा भइरहेको थिएटर भिलेजले जनाएको छ।
सुरज सुवेदीको नाट्य रुपान्तरणमा विमल सुवेदीको निर्देशन र दीलिप रानाभाटको सह–निर्देशनमा यो नाटक बन्न लागेको हो। उक्त नाटकको प्रदर्शन समय ढिला भएसँगै नाटक खेल्ने कलाकारमा पनि फेरबदल भएको छ। नाटक पटक–पटक सरेकाले नयाँ–नयाँ कलाकारलाई जुटाउन समस्या भएको कास्टिङ डिरेक्टर तथा सह-निर्देशक दिलिप रानाभाटले जानकारी दिए।
‘पल्पसा क्याफे’ का अर्का प्रमुख पात्र दृश्यको भूमिकाको भूमिका नाटक निर्देशक विमल सुवेदी आफैँले गर्ने भएका छन्। अर्का प्रमुख पात्र सिद्धार्थको भूमिका भने दिपेश राईले निभाउँदै छन्।
‘पल्पसा क्याफे’ उपन्यास नेपालको सर्वाधिक चर्चित उपन्यासमध्ये एक हो। यो पुस्तक अंग्रेजी, फ्रेन्च, कोरियन तथा सिंहला भाषामा अनुदित छ। १० वर्ष लामो सशस्त्र युद्धको वरपर रहेर एक पेन्टरको कथा बोल्ने उपन्यासले तत्कालीन परिवर्तनशील समाजको कथालाई सजिलो भाषामा बोलेर प्रसिद्धी कमाएको थियो। सशस्त्र युद्धमा सामेल भएको आफ्नो साथी सिद्धार्थले युद्ध हेर्न भनेर लगेपछि चित्रकार रहेको दृश्यले नजिकैबाट देखेको युद्धको वरपर उपन्यासको कथा घुमेको छ।
उपन्यासका धेरै पात्र स्पष्ट रूपमा लाखौँ मानिसको मनमा बसेकाले तीनको कथालाई नाटकमा लिएर जानु आफैँमा चुनौतीपूर्ण रहेको नाट्य रुपान्तरक सुरज सुवेदीले बताए। निर्देशक विमल सुवेदीले भने १५ वर्षपछि उपन्यासतिर फर्किदै त्यसले उ बेला उठाएका विषयलाई वर्तमान समयमा उभिएर विवेचना गर्न लागिएको जानकारी दिए।
भर्खरै ‘चिसो एष्ट्रे’ फिल्मको प्रदर्शन सकाएकी सृष्टिले यसभन्दा पहिला थिएटर भिलेजकै ‘ह्याम्लेट’ नाटकमा अभिनय गरिसकेकी छन्। विमल सुवेदीले भने ‘सान्दाजुको महाभारत’ ‘यार्मा’ ‘ह्याम्लेट’ ‘मालिनी’ जस्ता फरक डिजाइनका नाटक निर्देशनमार्फत आफूलाई चिनाएका छन्। लगभग १ दशकपछि पुनः अभिनयमा उनी फर्किदै छन्। भारतको नयाँ दिल्लीस्थित नेसनल स्कुल अफ ड्रामामा डिजाइन र डिरेक्सन अध्ययन गर्नुभन्दा पहिला विमल अभिनय र मोडलिङमा सक्रिय थिए।
नाटकमा सृष्टि र विमलका साथमा दिपेश राई, संगीता थापा, पूर्णिमा आचार्य, बच्चु हिमांशु, सरगम राई, ङिमा शेर्पा, जेनी सुनुवार, चक्र पुलामी, श्रवण सिंह राना लगायतका कलाकारको अभिनय रहनेछ।
