राष्ट्रिय स्वतन्त्र पार्टीका सभापति रवि लामिछानेले चितवन क्षेत्र नम्बर २ मा हालसम्म आइरहेको नतिजाबाट सन्तुष्ट रहेको बताएका छन्।
मतगणना स्थल अौद्योगिक प्रदर्शनी केन्द्रमा संचारकर्मीलाई प्रतिक्रिया दिँदै लामिछानेले इच्छाकामनामा नेकपा एमालेसँग ठूलो अन्तर हुने अनुमान गरेको दाबी गरे।
'तर भोट हामीले सोचेभन्दा धेरै आयो, अन्तर सोचे भन्दा कम भयो,' चितवन-२ का उम्मेदवार लामिछानेले भने, 'विपक्षी दलका नेताहरूले पनि सोचेभन्दा कम अन्तर आयो भन्नुभएको छ।'
चितवन-२ को इच्छाकामना गाउँपालिकाको मतगणना सकिएको छ।
यहाँको १०४०५ मत गणना हुँदा नेकपा एमालेका कृष्णभक्त पोखरेल ३६२३ मतका साथ सबैभन्दा अगाडि छन्।
नेपाली कांग्रेसका उमेश श्रेष्ठले ३२१६ मत प्राप्त गरेका छन्। लामिछानेले २९७८ मत ल्याएका छन्।
लामिछाने र पोखरेलको मतको अन्तर ६४५ छ। एमालेले यो गाउँपालिकाबाट कम्तीमा १ हजार ५ सय मतले लिड गर्ने आशा राखेको थियो। इच्छाकामनामा पहाडी क्षेत्रहरू पर्छन्।
अहिले कालिका नगरपालिकाको गणना सुरू भएको छ।
लामिछानेले कालिका नगरपालिकाका सबै वडाहरूमा आफूलाई उल्लेख्य मत आउने दाबी गरे।
'इच्छाकामनाबाट सोचेभन्दा बढी भोट आयो, अब लिड गर्ने पालो मेरो हो,' उनले भने।
चितवन-२ मा भरतपुर महानगरपालिकाका १० वटा वडाहरू पनि पर्छन्।
सभापति लामिछानेले आफ्नो पार्टीले देशभरबाट उल्लेख्य मत पाइरहँदा उत्साहित भएको बताए।
'समानुपातिकतर्फ तेस्रो दल बनिरहेका छौं, दोस्रो वा पहिलो बन्ने सम्भावना पनि देख्छु,' लामिछानेले भने।
