बाराको जितपुर-सिमरामा उपमहानगरपालिकामा नेकपा माओवादी केन्द्रले विजय हासिल गरेको छ।
सत्ता गठबन्धनको तर्फबाट उम्मेदवार बनेका नेकपा माओवादीका राजन पौडेल १८७४३ मत ल्याएर विजयी भएका हुन्। उनका निकटतम् प्रतिष्पर्धी एमालेकी सरस्वती चौधरी १७७७९ मत पाएकी छन्।
उपप्रमुखमा भने एमालेले जितेको छ। एमालेका भोलाप्रसाद अधिकारीले १७४९२ मत पाएका छन्। दोस्रो भएकी नेपाली कांग्रेसकी मेघा शाहीले मत १५८४२ ल्याएकी छन्।
यसअघि यो उपमहानगरपालिकामा एमालेले प्रमुख र उपप्रमुख दुबै जितेको थियो। त्यो बेलामा पौडेल तेस्रो भएका थिए।
११ उपमहानगरपालिकामध्ये माओवादीले पहिलो पटक प्रमुख जितेको हो। यसअघि उसले कुनै पनि उपमहानगरमा प्रमुख/उपप्रमुख जितेको थिएन।
विजयी भएसँगै सेतोपाटीसँग कुराकानी गर्दै पौडेलले जितपुर सिमरामा सुशासन कायम राख्न आफ्नो महत्वपूर्ण भूमिका हुने बताए।
'यो उपमहानगरपालिका सुशासनको सूचाकंकमा धेरै तल छ। यसलाई सुधार गर्नु मेरो चुनौती हो। मेरो ध्यान त्यसमा केन्द्रित हुन्छ। शिक्षा र स्वास्थ्यमा स्थानीय सरकारले गर्न सक्ने अधिकतम काम गर्नेछु,' उनले भने,'उपमहानगरका १ सय २५ जनप्रतिनिधिसँग सहकार्य गरेर काम गर्नु मेरो कर्तव्य हो। हामीलाई मत दिने र नदिने सबैलाई सम्मान गर्नेछु।'
उनले थारू,मधेसी, दलित, तामाङ, खस आर्य र नेवार समुदायको बसोबास रहेको भन्दै उनीहरूको भाषा संस्कृतिको जगेर्नामा प्रयास गर्ने बताए।
उनले आफू जनयुद्धको पृष्ठभूमिबाट आएको भन्दै जनयुद्ध,जनआन्दोलन र मधेश आन्दोलनका सहिद तथा बेपत्ताहरूको भावना अनुसार काम गर्ने बताए।
२०३५ साल चैत १० गते धादिङमा जन्मिएका पौडेल ०४४ सालदेखि सिमरामा बसोबास गर्दै आएका छन्।
२०५२ सालमा प्रथम श्रेणीमा एसएलसी उत्तीर्ण गरेका उनले काठमाडौं क्याम्पसबाट ग्रामीण विकास र समाजशास्त्रमा स्नातक गरेका छन्। क्याम्पस पढ्दै गर्दा पौडेल २०५६ सालदेखि तत्कालीन नेकपा (माओवादी) को विद्यार्थी संगठन अखिल (क्रान्तिकारी)बाट विधार्थी राजनीति सुरू गरेका हुन्। उनी २०५७ सालदेखि माओवादीको पूर्णकालीन कार्यकर्ता बने।
त्यसलगत्तै २०५८ सालमा पाटन संयुक्त क्याम्पसबाट पौडेललाई सेनाले गिरफ्तार गरेको थियो। करिब एक वर्षको जेल जीवनपछि रिहा भए। २०६० सालमा मकवानपुर धादिङमा खटिएको केही महिनामै पौडेललाई त्यही साल वीरगञ्जबाट सेनाले गिरफ्तार गरयो।
सेनाको चरम यातना, दमन सहेर पनि राजन पौडेलले जेल भित्रैबाट आन्दोलन गरेका थिए। उनले सुन्दरीजल जेलमा उनले २४ दिन आमरण अनशन बसे। डिल्लीबजार सदरखोर, वीरगञ्ज कारागार, भद्रगोल जेल, सर्लाही जेल र सुन्दरीजल जेल जस्ता सबै कारागारमा यातना भोगेको उनले बताए।
पौडेल नेकपा (माओवादी) राजनीतिक मूलधारमा आएपछि २०६३ जेष्ठ १० जेलबाट रिहा भएका हुन्। त्यसयता उनी बारा जिल्लामा रहेर काम गर्दै आएका छन्।
उनी अहिले माओवादी केन्द्रकी मधेस प्रदेश कमिटी सदस्य छन्।
