पर्यटकीय राजधानी पोखरामा अर्को नयाँ एड्भेन्चर थपिएको छ।
बन्जी नेपाल एड्भेन्चर्स प्रालिले पोखरा १७, रातोपैरा (माउन्टेन म्युजियमको आडैमा) बन्जीका लागि बनाएको टावरमा नेपालमै पहिलोपटक टावर क्लाइम्बिङ सुरू गरेको हो।
३५ मिटर अग्लो क्यान्टिलिभर टावरमा चढ्दा थकाइ लागे बीचमा रोकिएर आराम गर्दै पनि जान सकिन्छ। एड्भेन्चर भएकाले पूर्ण सुरक्षा सावधानीमा संरचना तयार गरिएको र सोही अनुसार सञ्चालन गरिने कम्पनीका अध्यक्ष सन्तोष भट्टराईले बताए।
टावर क्लाइम्बिङ गर्न एक जनाको हजार रुपैयाँ तोकिएको छ।
'टावर चढ्दा आवश्यक उपकरण कम्पनीले नै व्यवस्था गर्छ,' भट्टराईले भने, 'चढ्ने व्यक्तिले स्पोर्ट्स वेयर लगाएर आउँदा सजिलो हुन्छ।'
क्लाइम्बिङ गर्ने आफ्नो फोटो लिन चाहेमा थप दुई सय रुपैयाँ लाग्ने भट्टराईले बताए।
‘टावरमाथि पुगेर फराकिलो हिम शृङ्खलासँगै पोखरा आसपासका दृश्य अवलोकन गर्न सकिन्छ,' भट्टराईले भने, 'टावरमै बर्थडे, एनिभर्सरी सेलिब्रेसनको प्याकेज समेत बनाएका छौं।’
टावरसँगै बन्जी परिसरमै रेस्टुरेन्ट समेत सञ्चालनमा आएको छ।
अबको केही महिनामै बन्जी सुरू गरिने भट्टराईले बताए। टावरको संरचनागत काम सकिएको र कोभिड १९ का कारण जापानबाट प्राविधिक आउन बाँकी भएकोले बन्जी सुरू हुन ढिलाइ भएको भट्टराईले बताए।
भट्टराई अध्यक्ष रहेको कम्पनीमा राजु कुँवर, अशोक गुरुङ, दुर्गादत्त खरेल, दिल गुरुङ, दामोदर बराल, भूपाल बहादुर बराल क्षेत्रीको लगानी रहेको बताइएको छ।
अध्यक्ष भट्टराईले न्युजिल्यान्ड, जापान, मकाउलगायत देशमा बन्जी मास्टरको रूपमा लामो समय काम गरी स्वदेश फर्केर हाल आफ्नै साथीहरूको समूह बनाइ बन्जीमा लगानी गरेका हुन्।
बन्जी आइएसो स्टाण्डर्डमा निर्माण गरिएको भट्टराईको दाबी छ। बन्जीको अन्तर्राष्ट्रियस्तरमा बन्जीको लोकप्रिय नाम ‘गो बञ्जी' सँगको प्राविधिक समन्वयमा काम भैरहेको भट्टराई बताउँछन्।
