स्थायीत्वको सवालमा निकै कठिन बन्दै आएको अस्ट्रेलियामा यस वर्ष ५,०४८ नेपाली नागरिकले यहाँको स्थायी भिसा अर्थात पीआर पाएका छन्।
अध्यागमन विभागका अनुसार सन् २०१९/२० मा संघीय सरकारको वार्षिक आप्रवासी कार्यक्रम अनुसार ५ हजार भन्दा बढि नेपालीले पीआर पाएका हुन्।
जसमध्ये ४ हजार ६ सय ६६ जना नेपालीले दक्ष आप्रवासी कार्यक्रम अनुरूप पीआर पाएका हुन्। बाँकी ३ सय ८२ जनाले पार्टनर तथा बालबालिकाका रूपमा स्थायी भिसा पाएको अध्यागमनको वार्षिक प्रतिवेदनले जनाएको छ ।
अस्ट्रेलियामा पछिल्ला दिनमा ह्वात्तै बढेको नेपाली समाजको गणितलाई केलाउने हो भने यो अंकले पनि थप प्रमाणित गरेको छ ।
अध्यागमनको पछिल्ला प्रतिवेदन हेर्ने हो भने सन् २०१०/११ मा दुई हजारको हाराहारीमा रहेको यो संख्या २०१५ मा आइपुग्दा दोब्बर अर्थात चार हजार पुगेको देखिन्छ। यसले वार्षिक रूपमा नेपाली नागरिकले अस्ट्रेलियाली स्थायी भिसा पाउने सङ्ख्या वृद्धि हुँदै गइरहेको देखाएको छ।
पछिल्लो अध्यागमनको वार्षिक प्रतिवेदन अनुसार अस्ट्रेलियाको स्थायी भिसा पाउने राष्ट्रको सूचीमा नेपाल प्रमुख सात भित्र परेको छ।
पछिल्लो तथ्यांकअनुसार, नेपाल २०१९/२० मा छैठौं स्थानमा उक्लिएको हो। पहिलो पाँच राष्ट्रमा चीन, भारत, संयुक्त अधिराज्य, फिलिपिन्स र भियतनाम छन्।
अस्ट्रेलियाले दक्ष जनशक्ति भित्र्याउने योजना अनुसार कुल १ लाख ४० हजार मानिसलाई स्थायी भिसा प्रदान गरेको छ। ती मध्ये दुई तिहाइ अस्ट्रेलियामा पढेका र अनुभव संगालेका मानिस रहेको अस्ट्रेलियन सरकारले जनाएको छ।
‘कुनै समय एउटा नेपालीले अर्को नेपाली भेट्न दसैं तिहार जस्ता पर्व कुर्नुपर्थ्यो, तर अहिले जुनै क्षेत्रमा पनि नेपालीको उपस्थिति बाक्लै भेटिन्छ। यो महत्वपूर्ण पाटो हो’, दुई दशकअघि अस्ट्रेलिया आएका शैक्षिक तथा अध्यागमन परामर्शदाता हरि पोखरेलले भने।
सन् २००० भन्दा अघि र अहिले अर्वन, रकडेललगायत क्षेत्र पुग्दा फरक अनुभूति हुने गरेको पोखरेलले बताए।
अर्वन र रकडेल क्षेत्रमा अहिले करिब पाँच हजारको संख्यामा नेपालीको बसोबास रहँदै आएको छ। जसको प्रभाव अनुरूप ट्रेन स्टेसनमै मःमः, चाउमिन अनि छोयला र सेकुवासमेत पाइन्छ।
